Content on this page requires a newer version of Adobe Flash Player.

Get Adobe Flash player

Rezultadu Monitorizasaun Luta Hamutuk ba implementasaun Programa Nasional Dezenvolvimentu Suku [PNDS] 06 November 2015

Rezultadu monitorizasaun ne’ebe Organizasaun Naun-Governamental (ONG) Luta Hamutuk halo iha Suku Cunha, Costa no Lalisuk, iha Rejiaun Administrativu Espesial Oe-Cusse nian hatudu katak, implementasaun projetu husi Programa Nasional Dezenvolvimentu Suku (PNDS), liliu ba reabilitasaun Estrada, la dura.

Koordenador Oil Transparancy ONG Luta Hamutuk, "Nelson Miranda" ne’ebe hala’o monitorizasaun iha Oe-Cusse hatete, "durante hala’o monitorizasaun/observa katak, PNDS ajuda ona komunidade hodi hadia Estrada balun, maibe la dura tanba halo de’it ho sumenti.

“Iha suku Costa, Aldeia Sananeno Lakufuan, PNDS halo duni reabilitasaun (ba Estrada) maibe laiha kualidade no nia kondisaun aat nafatin tanba sira uza de’it sumenti hodi cor Estrada ninin, maibe Estrada klaran sira husi kuak nafatin,” dehan Nelson ba Jornalista sira iha Edifisiu Luta Hamutuk, Palapasu, Sesta (02/03).

Aleinde ne’e, nia dehan, problema kondisaun Estrada afeita mos komunidade sira seluk iha Suku Lalisuk no Suku Cunha-Pante Makasar ne’ebe liga ba postu Administrativa Nitibe no Oessilo.

Tuir rejultadu monitorizasaun LH, Estrada sira iha vila laran (Pante Makasar) de’it to’o agora nia kondisaun sei at.

Nelson hatete, kondisaun ne’e difikulta komunidade sira ne’ebe hakarak asesu transporte. “Liliu Estrada mak liga husi Suku Costa ba Lalisuk no Cunha ne’e kondisaun aat tebes tanba Estrada laran kuak boot-boot no kuak naruk turi estrada, estrada ne'ebe nia kondisaun at ho nia naruk kuaze kilometru sia (9km),” dehan Nelson.

Nia lamenta tanba kada tinan Parlamentu Nasional sempre aprova osan miliaun ida ba leten atu dezenvolve Timor-Leste, maibe komunidade barak iha area seidauk sente, no preokupa nafatin ba kondisaun infrastrutura baziku. Hanesan iha Munisipiu Dili, nia hatete, kuaze Estrada sira iha Aldeia laran atu di’ak hotu ona, maibe iha Munisipiu seluk, Estrada sira ne’ebe liga husi kapital Munisipiu ba Postu de’it kuak sorin-sorin, satan liga ba Suku no Aldeia.

Alende kestiona kona-ba Estrada, Luta Hamutuk mos hato’o preokupasaun komunidade Oe-Cusse nian kona-ba asesu ba bee-moos, eletrisidade, Irrigasaun no kondisaun Eskola nian.

Tuir Nelson katak, durante halao monitorizasaun no observasaun, komunidade sira iha Suku Costa, Aldeia Palaban, Lorloron konsumu de’it bee posu ne’ebe merak (is tasi ben no masin). “Ami haree kuaze komunidade tomak iha Oekusse ne’e konsumu de’it bee posu no balu konsumu bee husi mota no lagoa tanba laiha kanalizasaun bee-moos iha ne’eba,” dehan Nelson.

Publika iha Jornal Independente iha loron 23/03/2015 pag 5


comment

Total Comment (0)