Content on this page requires a newer version of Adobe Flash Player.

Get Adobe Flash player

Analiza Kauza no Solusaun kona ba Kestaun Projetu Infraestrutura iha Rai Laran Ne'ebe Laiha Kualidade 30 June 2014

 LUTA HAMUTUK apresia komitmentu polítika governu hodi halo investimentu boot ba setór infraestrutura, nu'udar pilar sentrál mak prioritáriu iha prosesu dezenvolvimentu nasionál, ne'ebé mak klaramentu mensiona iha Planu Estratéjiku Dezenvolvimentu Nasionál (PEDN) 2011-2030. Infraestrutura prinsipál sira mak hanesan estrada, ponte, bemos, irrigasaun, eletrisidade, eskola, klínika no nst, importante hodi hodi bele kontribui ba kresimentu ekonómiku no kria empregu iha distritu sira. Tanba liu 70% populasaun mak moris iha área rurál ne'ebé sei kontinua enfrenta problema falta de infraestrutura bázika, ezemplu estrada rurál ne'ebé kuaze 85% laiha kondisaun (aat), 75% seidauk iha asesu ba bemos,  50% eskola laiha fasilidade bemos no moos falta de fasilidade eskola no saúde.  Luta Hamutuk foo atensaun makas ba programa infraestrutura rai laran ne'ebé finansia husi Orsamentu Jerál do Estadu tanba, alokasaun ba programa infraestrutura mak sei foo benefísiu direita ka nu'udar meius distribuisaun rekursu públiku ba povu iha área rurais.  

 

 

Kualidade implementasaun projetu nu'udar fenómenu ne'ebé mak mosu iha prosesu dezenvolvimentu infraestrutura rai laran, ne'ebé sempre sai preokupasaun públiku durante ne’e. Tanba projetu infraestrutura ne'ebé mak laiha kualidade konserteza sei la foo benefísiu ba povu nu'udar tarjetu benefisiáriu, no sei prejudika funsaun orsamentu iha kontestu distribuisaun ekonomia ba povu. Realidade hatudu mai ita katak iha projetu lubuk ida ne'ebé mak Governu liu husi Ministériu sira planeia no implementa kada tinan, sidauk bele hatudu rezultadu másimu intermus kualidade. Nune'e asuntu kualidade sempre sai nafatin preokupasaun públiku iha nivel Nasionál too Suku.

 

 

Durante tinan 7 (hitu) nia laran depois de Timor Leste hetan rendimentu husi Mina no Gás (Fundu Minarai), Governu Timor Leste gasta ona orsamentu hamutuk Biliaun US$3.0 Dolar Amerikanu (esklui Fundu Dodores no Imprestimu) ba programa infraestrutura rai laran ne'ebé aloka liu husi Kapitál Dezenvolvimentu. Maibé orsamentu hirak ne’e seidauk bele rezolve kestaun falta asesu ba infraestrutura bázika, signifika katak orsamentu ne’e seidauk halo mudansa signifikante ba povu nia kondisaun ekonomia no sosiál. Tanba ne’e, Governu nu'udar jestor ba orsamentu estadu tenke iha responsabilidade no akuntabilidade atu jere rekursu públiku hodi  bele responde problema nesesidade bázika, atravesa polítika Orsamentu Jerál do Estadu ho efetivu no efikásia.  

 

 

Projetu tenke iha kualidade di'ak, tanba kualker projetu infraestrutura ne'ebé mak finansia husi Orsamentu Jerál Estadu, ne’e presiza konsidera nu'udar investimentu ba longu prazu, ne'ebé mak bele kria kondisaun hodi fasilita povu nia nesesidade sosiál no ekonomia. Projetu ne'ebé mak iha kualidade la'ós de'it projetu ne'ebé implementa tuir padraun tékniku no dura ba tempu naruk, maibé kualidade projetu ruma bele sukat moos husi oinsá planeamentu projetu ruma bele responde nesesidade no prioridade povu (responsivu), la'ós kria projetu tanba iha interese ruma.  

 

 

Kada tinan fiskál, Orsamentu Jerál do Estadu ne'ebé aloka ba programa sira iha kategoria Kapitál Dezenvolvimentu, Governu sempre reapropria (rollover) ba tinan fiskál foun, tanba de'it projetu barak mak la konsege ezekuta hotu.  Ezemplu tinan 2012 Governu reapropria orsamentu hamutuk millaun US$409.8 ba tinan 2013, no iha tinan 2013 Governu reapropria tan orsamentu millaun US$379.9 ba tinan 2014. Nune'e iha tinan 2014 liu husi Komisaun Eventuál Parlamentu Nasionál ho Governu halo konsensu hodi kansela 212 projetu infraestrutura. Signifika katak inkapasidade Governu hodi ezekuta orsamentu, fo impaktu ba alokasaun no distribuisaun ekonomia ba povu. tanba implementasaun Orsamentu Jerál do Estadu mak fatór importante hodi sukat distribuisaun osan/ rikeza, sukat moos dezenpenhu Governu, no ita bele dehan katak kapasidade ezekusaun ne'ebé fraku, minimiza tiha benefísiu ba povu. Inkapasidade ezekusaun OGE ne’e konserteza sei la kontribui ba ambisaun Governu hodi bele atinji objetivu PEDN iha médiu, kurtu no longu prazu.

 

 

Rezultadu monitorizasaun Luta Hamutuk durante ne’e ba prosesu planeamentu no implementasaun projetu infraestrutura rai laran, ne'ebé hahú kedas husi Projetu Pakote Referendu, Programa de Dezenvolvimentu Desentralizadu (PDD), Programa Dezenvolvimentu Lokál (PDL) no Fundu Infraestrutura (FI), konsege identifika fatór lubuk ida ne'ebé mak sai kauza ba projetu ne'ebé laiha kualidade, mak hanesan tuir mai:

 

1.      Planeamentu Projetu la bazeia ba estudu tékniku (viabilidade tékniku)

Hahú kedas husi tinan fiskál 2009 bainhira Governu hamosu Pakote Referendu ba Distritu 13, ho totál orsamentu hamutuk US$70.0 kestaun kualidade projetu sai ona públiku nia preokupasaun. tanba iha projetu lubuk ida ne'ebé mak la benefisiária ba povu tanba laiha kualidade, balun la implementa tanba kestaun kapasidade finanseiru no balun implementa maibé la foo benefísiu ba komunidade tanba la'ós prioridade Suku. Iha tinan 2011 Governu hamosu tan polítika foun ida ne'ebé hanaran Programa de Dezenvolvimentu Desentralizadu I no II (PDD), infelizmente realidade kontinua hatudu nafatin projetu barak mak laiha kualidade. Tuir Monitorizasaun Luta Hamutuk identifika katak kauza husi problema kualidade Projetu ne’e, tanba projetu barak ne'ebé mak Governu planeia no orsamentu sem baze estudu tékniku ne'ebé integradu hodi haree ba viabilidade tékniku no finanseira, la tuir padraun tékniku, no balun labele implementa tanba la viavel ka laiha rasionalizasaun kustu ho kondisaun iha terenu.

Luta Hamutuk konsidera Governu (instituisaun kompetente sira) sempre halo repetisaun erru / fallansu ne'ebé akontese kada tinan no ne’e hatudu katak Governu laiha seriedade atu hadi'ak sistema planeamentu infraestrutura ne'ebé seidauk di'ak. Kestaun ida ne’e konserteza prejudika obra ne'ebé implementa husi kontrator sira, tanba alende sira enfrenta ona obstaklu falta de rekursu sira moos sei enfrenta obstaklu iha terenu, Nune'e obstaklu hirak ne’e sei foo impaktu direita ba kualidade obra ne’e rasik.    

 

Atu bele rezolve kestaun projetu laiha kualidade husi aspetu planeamentu, Luta Hamutuk sujere ba Governu atubainhira kria Projetu ka aprova proposta Projetu ruma husi nivel Distritál, presiza halo estudu viabilidade tékniku no finanseiru antes atu orsamentu Projetu. Hodi Nune'e Projetu ne’e rasik teknikamente viavel duni atu implementa tuir nia espesifikasaun, dezenhu tékniku no BoQ.

Agensia Dezenvolvimentu Nasionál (ADN) ne'ebé halo papál quality control  ba Projetu iha Kapital Dezenvolvimentu, presiza fo apoiu másimu ba linha Ministériu sira iha prosesu halo planu konstrusaun sivíl, espesifikamente ba Ministériu Administrasaun Estatál (MAE) ne'ebé responsabiliza jestaun ba PDD I. Apoiu tekniku ADN ne’e atu halo avaliasaun profunda ba BoQ, Dezeñu, Espesifikasaun Tékniku no Kustu Estimativa antes Projetu ne’e entrega husi MAE ba Komisaun Dezenvolvimentu Distritál (KDD) hodi halo prosesu adjudikasaun no implementa husi kontrator lokál sira

 

 

2.      Falta kontrolu no Supervizaun

Maski iha duni instituisaun kontrolu (quality control) sira mak hanesan Agensia Dezenvolvimentu Nasionál, Obra Publika no Parlamentu Nasionál rasik ne'ebé hala'o kna'ar fiskalizasaun, maibé tuir Luta Hamutuk nia haree katak kondisaun hirak ne’e sei labele asegura kualidade Projetu ruma bainhira supervizaun Projetu iha nivel Distritu sei fraku. Atu projetu ruma bele iha kualidade di'ak tenke implementa duni tuir dezenhu ka espesifikasaun tékniku, no moos presiza iha kontrolu no supervizaun regularmente (lor-loron) husi pesoál Governu (project owner) hanesan supervisór iha nivel rejionál no Distritál ba progresu implementasaun projetu.

Tuir Luta Hamutuk nia monitorizasaun iha terenu identifika katak, maski supervisór iha Distritu halo duni funsaun supervizaun ba projetu, maibé kuantidade supervizora Governu la sufisiente hodi bele kobre tomak projetu iha kada Suku ka Sub-Distritu ho distánsia fatin ne'ebé dook ba malu. Alende sira moos ladún iha fasilidade transporte ne'ebé mak sufisiente hodi fasilita sira nia servisu iha terenu. Limitasaun ida ne’e bele lori pesoál kontrolu sira ba iha tentasaun korrupsaun. tanba ne'e, falta de kontrolu husi instituisaun kompetente iha nivel Distritu too Suku ba implementasaun projetu nu'udar kauza ne'ebé hamosu projetu laiha kualidade.

 

Atu bele rezolve kestaun falta de kualidade, Governu atravesa Ministériu Obra Publika rasik presiza iha ona polítika hodi aumenta númeru supervisór ne'ebé ho kapasidade tékniku di'ak, inklui mos fasilita servisu supervisór Distritál sira atu bele halo funsaun ho efetivu liu tan, iha prosesu monitorizasaun no supervizaun implementasaun Projetu.  

 

 

3.      Falta kapasidade kontratores (implementador)

Luta Hamutuk apresia kontribuisaun husi setór privadu, liu-liu kontrator Timor oan sira ne'ebé sei enfrenta limitasaun rekursu oi-oin maibé balun konsege hatudu rezultadu servisu ne'ebé di'ak. Rezultadu monitorizasaun Luta Hamutuk identifika katak, kapasidade rekursu finanseiru no kapasidade tékniku profesional (professional skill) sei limitadu tebes, ka sidauk balansa ho kompleksidade implementasaun projetu. tanba ne'e Governu konserteza iha responsabilidade nafatin atu kria kondisaun hodi kapasita kontrator lokál sira atu sira moos bele hala'o nia papél ho másimu tuir ita hotu nia espetasaun. Alende ne’e, kontrator Timor oan sira moos presiza dezenvolve an hodi Nune'e labele sai de'it parseiru ne'ebé pasivu (depende de'it projetu Governu).

Luta Hamutuk kestiona atitude no mentalidade kontrator lokál balun ne'ebé mak ladún iha sentidu nasionalizmu no responsabilidade morál ba fiar ne'ebé mak estadu foo, ne'ebé dala barak hanoin lukru boot de'it maibé la preokupa ho kualidade obra. tanba iha tinan 2009 atravesa polítika Pakote Referendu too iha programa PDD, Governu gasta ona orsamentu lubuk ida liu husi adjudikasaun Projetu ho sentidu atu kapasita kontrator lokál sira, maibé polítika ida ne’e konsidera falla no nakonu ho interese polítika ka grupu.     

 

Tanba ne'e, Luta Hamutuk sujere ba Governu atu limite ona polítika adjudikasaun projetu ba kontrator lokál sira tanba, durante tinan 4 nia laran (hahú husi Projetu Pakote Referendu to’o PDD) nu'udar tempu de toleránsia  ne'ebé másimu ona iha prosesu kapasitasaun setór privadu / kontrator lokál. Nune'e Governu presiza aplika ona sistema aprovizionamentu normál (full procurement) ne'ebé transparente aplika ba Projetu hotu-hotu ne'ebé mak uza orsamentu estadu, atu Nune'e bele asegura kualidade Projetu konstrusaun sivíl iha Timor Leste. Sistema ne’e moos presiza aplika ba Projetu ne'ebé mak finansia husi Agensia Internasionál sira, atu Nune'e bele iha uniformizasaun sistema aprovizionamentu ba setór hotu-hotu no prevene moos pratika Korrupsaun, Koluzaun no Nepotizmu. tanba dala barak Projetu balun laiha kualidade ne’e konsekuénsia husi pratika korrupsaun (mark-up no mark-down) mak akontese.

 


4.      Sistema Pagamentu ba Projetu

Iha monitoramentu Luta Hamutuk ba implementasaun projetu iha nivel Distritu, konsege identifika kestaun balun ne'ebé mak sai moos kauza ba projetu ne'ebé failla no laiha kualidade, mak hanesan pagamentus ba kontrator ne'ebé la haktuir mekanizmu ne'ebé regula Lei ka pagamentus Governu sempre la'o tarde. tanba ne'e iha projetu barak ne'ebé implementa husi kontrator lokál sempre hasoru dezafiu no hetan fallansu iha implementasaun tanba laiha limitasaun rekursu /osan atu finansia projetu. Signifika katak pagamentus ne'ebé la'o tarde ne’e moos kontribui ba faillansu implementasaun Projetu, Nune'e la'ós de'it falla husi kontrator sira de'it. Tuir Luta Hamutuk nia analiza katak mekanizmu ne'ebé la'o durante ne’e la korresponde ho objetivu programa dezenvolvimentu lokál ne'ebé mak moos atu kapasita kompañia lokál.

 

Governu presiza hadi'ak sistema pagamentu ne'ebé mak sempre la'o tarde, liu-liu ba projetu PDD / PDID. tanba sistema pagamentus durante ne’e sempre atraza no la lao tuir mekanizmu pagamentus ne'ebé mak regula iha Dekretu Lei PDD. Nune'e afeta ba implementasaun projetu la'o tarde (Projetu la tuir kontratu data) no implika moos ba kualidade projetu.

 

 

5.      Projetu emerjénsia (single source)

Asuntu dezenvolvimentu infraestrutura mak durante ne’e sai polémika mak Projetu emerjénsia ne'ebé laiha baze fundamentu. Tanba bainhira trata projetu ruma ho karakter emerjénsia, kondisaun projetu ne’e rasik tenke prienxe rekizitu (estandar emerjénsia) ne'ebé regula iha Lei Regimentu Juridiku Aprovisionamentu. Tuir dadus ne'ebé Luta Hamutuk identifika iha liu husi Portál Aprovizionamentu (www.eprocurement.gov.tl/)  hatudu katak, hahú husi 2008 ate 2014 projetu mak jere liu husi aprovizionamentu nasionál hamutuk 1835 projetu, husi totál projetu ne’e iha 239 projetu mak implementa nu'udar projetu emerjénsia (esklui projetu ne'ebé Ministériu sira adjudika direita). Projetu sira ne'ebé mak trata ho mekanizmu emerjénsia dala barak hamosu problema falta de kualidade, Nune'e projetu ne’e laiha benefísiu ba komunidade ne'ebé enfrenta situasaun emerjénsia no presiza atendimentu imediata. Realidade balun hatudu katak projetu emerjénsia balun ne'ebé tenke halo lalais tanba emerjente, ikus mai nia implementasaun kleur liu fali projetu normál no balun la konsege finaliza. Mosu situasaun ida ne’e moos tanba falta de kontrolu husi Instituisaun kompetente sira hodi bele asegura implementasaun projetu tuir duni planu no foo rezultadu ne'ebé di'ak ba komunidade ne'ebé presiza. Alende ne’e, Luta Hamutuk moos identifika katak instituisaun / Ministériu sira seidauk iha mekanizmu internu ne'ebé forte atu evita mosu pratika korrupsaun “conflict of interest” iha prosesu adjudikasaun direita (single source) Projetu emerjénsia ba kontrator.

 

Luta Hamutuk hakarak rekomenda ba Governu atu halo estudu klean ba kondisaun infraestrutura iha territóriu Timor Leste, hodi bele identifika kondisaun infraestrutura ne'ebé mak fraku ona no bele akontese situasaun emerjénsia. Nune'e rezultadu estudu ne’e bele uza sai baze ba planeamentu infraestrutura foun ne'ebé aplika sistema aprovizionamentu normál. Hodi Nune'e mak ita bele prevene volume projetu emerjénsia ne'ebé sa'e ba beibeik no sai poténsia moos ba korrupsaun. Alende ne’e, Luta Hamutuk moos rekomenda atu iha moos estudu integradu ho instituisaun relevante sira atu haree ba área sira ne'ebé mak iha pontensia boot ba Dezastre naturais, atu Nune'e ita bele halo prevensaun antes mosu situasaun emerjénsia. Se lae, povu kontinua moris iha situasaun emerjénsia, maibé situasaun ne’e rasik bele sai fali oportunidade ba ema / grupu balun hodi hetan benefísiu.

 

 

Husi: Mericio AKARA no Elio Pereira