Content on this page requires a newer version of Adobe Flash Player.

Get Adobe Flash player

Papel Edukasaun Determina Futuru Nasaun 15 November 2013

Edukasaun fator determinante no xave importante ba dezenvolvimento nasaun. Wainhira ema edukadu otomatikamente nia sei hanoin buat ne’ebe diak hodi dezenvolve nia nasaun maske nia kontribusaun ki’ik, no wainhira ema edukadu nia sei hanoin buat ne’ebe positifu atu dezenvolve nia nasaun, tanba ne’e atu dehan katak edukasaun fator importante ba nasaun ida ne’ebe foin ukun an no tenke define modelu edukasaun hodi bele sai fundamentu ida atu lori nasaun ba oin no mos wainhira atu sukat nasaun ida iha mudansa ou lae depende ba edukasaun tanba edukasaun mak atu hamosu rekursu iha futuru.

 

 

Karik ita hotu sei lembra wainhira Hiroshima ho Nagasaki depois de hetan destroy, iha perguntas ida ne’ebe dala ruma ita labele imajina husi kaisar Japan katak: “Iha mestri hira mak mate no iha mestri hira mak sei moris?” Ida ne’e atu hatudu mai ita katak edukasaun fator ida ne’ebe importante duni ba nasaun ida hodi bele ejisti nafatin.

 

 

Wainhira ita hare’e fali ita nia nasaun ne’ebe foin ukun an (maske hau ladun gosta ho lia fuan foin ukun an tanba dala barak, ita nia ukun nain sira sempre fo sala FOIN UKUN AN ne’ebe hateten katak: ita foin ukun ne’ebe prosesu mak hanesan ne’e, sistema mak hanesan ne’e, ita sempre lao tuir prosesu no foin aprende no buat barak). Los katak ita hotu sempre tuir prosesu ho sistema ne’ebe iha ona, maibe dala barak sistema balun seidauk hodi implementa. Ejemplu iha parte Edukasaun ho sistema Ensino Baziku. Fasilidade laiha, infraestrutura sei problema, preofesores minimu no kurikulum aprendizazen ne’ebe seidauk klaru, rekrutamentu profesores ne’ebe dalabarak ho karakter familiarismu, rekruta profesores laos ho background profesores, treina profesores hodi hasae kapasidade profesores maibe ho modelu selu profesores hodi tuir kursu. Tuir lolos atu dezenvolve nia nasaun tenke iha inisiativa rasik atu hasae nia kapasidade hodi bele hanorin estudante sira tanba nudar edukador iha responsabildade moral, hodi iha kapasidade, nune’e bele hanorin estudandante atu sai ema. Pior liu mak profesores balun la tuir kursu maibe wainhira simu osan ho sertifikadu, sira mos hetan no dala barak mosu problema entre proesores sira, ne’ebe ita atu lori ba ne’ebe ho modelu edukador hanesan ne’e, edukador hanoin ona hanesan ne’e satan estudante ne’ebe mak sei persija hetan edukasaun?  

 

 

Sistema Ensino Baziku, laos la bele implementa, maibe persija halo estudu ida, para bele hatene nia problema, nune’e wainhira implementa la bele akontese problema ne’ebe boot, hanesan hakerek ona iha leten.

Wainhira ita akonpanha alokasaun Orsamento Estado ba Ministerio Edukasaun husi tinan 2006 to’o 2013, iha mudansa boot ba alokasaun, ne’e diak ba nasaun tanba ho objetivu alokasaun orsamento bele hamosu rekursu barak hodi dezenvolve nasaun ne’e ba oin. Maibe wainhira ita akonpanha fali rezultado alokasaun, tristeza boot ba ita, tanba husi trezi (13) distritu sempre hasoru problema no problema mak sempre hanesan husi tinan ba tinan, infraestrutura laiha, fasilidade meja-kadeira laiha, livru laiha, falta de profesores, ezemplu: Profesores Menus, Estudante EP 7 setembru Balibo 140 (alunus) monta iha sala ida, Jornal Diario 15 abril 2013, Pag: 06, no buat barak, iha realidade ida ne’ebe akontese tan iha Distritu Baucau, suku Tirilolo, sobre edukasaun ne’ebe inan-aman sira inisiativa selu profesores hodi hanorin nia oan sira tanba profesores laiha, no sei iha ezemplu barak ne’ebe akontese distritu seluk ne’ebe inan-aman tau osan hodi halo eskola temporariu para nia oan sira bele uza. Ita koko halo analiza hamutuk, problema lolos iha ne’ebe? Osan mak la to’o ka, ema sira ne’ebe foti decision maker mak laiha seriadade hodi resolve problema edukasaun? tanba alokasaun orsamento ba Ministerio Edukasaun dala barak la ezekuta hotu, ejemplu iha tinan 2012, Orsamento Estado ba Ministerio Edukasaun e Kultura hamutuk Miloens US$ 93,766, no la ejekuta miloens US$ 6,610. (inklui ministeriu sira seluk). Problema saida mak akontese wainhira Ministeriu Edukasaun laiha seriadade hodi resolve problema edukasaun? nasaun sei iha krize rekursu iha futuru no tempu ruma ita labele imazina nasaun atu sai saida.

 

 

Rekrutamentu ba preofesores wainhira ita akonpanha, sei iha problema barak tanba dala barak halo rekrutamentu profesores balun laiha background profesores, tanba deit eskola remata ho sarjana ka diploma no hatene lingua portuges, ema sira ne’e ba ona hanorin.

 

 

Wainhira Ministro Edukasaun halo aprezentasaun ida iha enkontro Timor Leste Development Partner Meeting (TLDPM) iha loron Kinta feira 20/06/2013, hateten “tanba sei falta rekursu umanu, hakarak ka la koi, ita tenki uza ema sira ne’e”, los katak ita sei iha problema ho rekursu umanu, maibe la bele haluha mos katak iha tinan-tinan, governo sempre aloka osan liu husi orsamento kategoria “Commissão de Administracão do Fundo Desenvolvimento Capital Humano – FDCH” (tinan kotuk 2012 aloka osan miloens US$ 37,448, no tinan agora 2013, aloka tan osan miloens US$ 42,448), hodi halo kapasitasaun ou fo bolsu de estudu. Iha Timor mos, iha universidade barak ne’ebe tinan-tinan sempre hasai sarjana barak, no agora perguntas mai ita mak “EMA SIRA NE’E BA NEBE HOTU” no responde husi Minitru Edukasaun katak “barak mak la adekuadu”, se Ministru Eduksaun rasik rekoinese katak rekursu barak mak la adekuadu, tenki iha ona evalusaun hodi resolve problema ne’e, para iha futuru bele hadia, laos tanba la iha rekursu umanu no la adekuadu halo rekrutamentu la ho professional.

 

 

Problema saida mak akontese wainihra Ministerio Edukasaun halo rekrutamentu profesores la ho professional, rekruta profesores laiha background hanorin? Iha jornal STL (Sabadu: 09/06/2012) iha tinan kotuk liu wainhira tempu kampanye iha profesores balun abandona estudante sira hodi tuir kampanye elisaun, no iha jornal Diariu fulan marsu 2013, iha tristeza boot ida ba prosesu aprendizazen ne’ebe ita bele dehan katak Edukasaun Failha hodi fo nia kontrolo ba profesores sira ou bele dehan sistema rekrutamentu ba profesores sira ne’ebe dala barak iha tendensia familiarismu no laiha background ba hanorin to’o rezultado akontese mak alunus sira sai fitima ba profesores sira ne’ebe ho jeitu PREMAN no sona estudante ho Lapis (Mestri Sona Estudante Ho Lapis: jornal Nasional Diario; tersa feira: 12/03/2013, Pag: 01). Lolos nudar edukador ida oinsa atu hanorin nia estudante para atu sai ema (filosofia edukasun katak halo ema atu sai ema/ memanusiakan manusia) ne’ebe mak nasaun persija iha futuru, laos ho karakter obriga estudante hodi tuir nia sistema otoriter ne’ebe hetan iha tempu pasadu. Profesores iha peranan boot hodi desidi nasaun nia futuru tanba ne’e persija halo kontrolo no buka nia problema abut tanba sa bele akontese problema sira henesan ne’e? tanba nudar edukador, oinsa atu hanorin esudante atu sai ema no iha karakter rasik oinsa atu muda nia an hodi bele kontribui ba prosesu dezenvolvimento nasaun, laos haruka estudante sira lori bloku, fatuk no buat seluk wainhira estudante tarde ou la konsege akapta prosesu aprendizazen iha aulas laran, oinsa atu estudante sente iha uma (feel at home) ho prosesu aprendizazen ne’ebe lao ho modelu hanesan ne’e.

 

 

Ministerio Edukasaun tenke define ona sitema ida ne’ebe diak hodi define karakter profesores sira hodi iha responsabilidade moral ba estudante, hodi define karakter estudante sira, nune’e bele desidi karakter nasaun, tanba ho modelu profesores balun ne’ebe laiha responsabilidade, sei kria estudante ASAL NAIK KELAS no iha futuru nasaun sei problema, tanba profesores nudar edukador iha obrigatoriu hodi fo kapasitasaun ba estudante laos sai profesores hanesan pelarian hodi bele hetan osan/salariu. Iha jornal STL, data 18/04/2013, Pag: 11. Primera Dama Isabel Fereira hateten katak “Sai profesores laos profesores ba salariu, tanba sai profesores sai nudar edukador ba ita nia oan sira atu sai lider iha futuru nasaun Timor Leste”. Hanoin husi Primeira Dama hanesan reflesaun ba profesores sira hodi sente katak, los duni sai profesores laos kestaun tanba osan/salariu no pelarian ida, maibe sai profesores hanesan komitmentu professional (harga mati) hodi eduka nia oan sira atu sai ema iha futuru, maske dala barak ema dehan katak Guru adalah pahlawan tak berjasa maibe nia rezultadu signifikante tebes ba nasaun ida.

 

 

Tanba edukasaun fator ida ne’ebe importante no bele desidi nasaun ida nia futuru, tenke tau iha prioridade hodi trasa planu ba dezenvolve edukasaun. Ministeriu Edukasaun iha dever boot hodi desidi karakter estudante hodi bele funda nasaun nia futuru, liu husi eskola sira, tanba ne’e Ministeriu Edukasaun tenke tau as wainhira halo rekrutamento ba profesores no mos persija tau iha planu, oinsa aloka osan, bele mos hasae proposta Orsamento ba Ministerio Edukasaun, para bele hetan rekursu umanu ne’ebe iha kapasidade hodi dezenvolve nasaun, para bele mos desidi karakter nasaun husi agora, tanba foin ukun an persija define ona, atu labele tarde liu hodi funda nasaun nia karakter no importante mak oinsa Ministeriu Edukasaun atu kontrolo nafatin alokasaun orsamento estado hodi iha rezultadu no tenke kontrolo nafatin mos profesores atu hanorin tuir padraun edukasaun katak atu halo ema sai ema para bele desidi nasaun nia futuru.

 

 

Hakerek nain:

Jonathan Gonsalves

Staff Luta Hamutuk Institute