Content on this page requires a newer version of Adobe Flash Player.

Get Adobe Flash player

Pensão Mensal Vitalícia dos Deputados e Outras Regalias iha fundamento kalae....??? 11 June 2013

Pensão Mensal Vitalícia dos Deputados e Outras Regalias iha fundamento kalae....???

Lei N.1/2007: Pensão Mensal Vitalícia dos Deputados e Outras Regalias nebe produs iha janeiru 2007 kontinua sai diskusaun publiko maske iha kampaina elisaun 2012 sai mos hanesan issue nebe partidus politiko sira uza. Partidus politiko hirak ne’e mos hatudu komitmentu katak sei muda lei ida ne’e wainhira sira eleitu. Maibe wainhira eleitu tia partidu hirak ne’e mos nonok tia deit hanesan lei ida ne’e la iha.

Liu husi artigo ida ne’e hau hakarak fo hau nia opinau ba lei pensaun vitalisia ne’e iha fundamentu kalae atu nune bele kontinua implementa ka halo revizaun ba lei ida ne’e. normalmente wainhira atu produs legislasaun ida, iha fundamentu importante tolu nebe mak sai hanesan baze mak hanesan fundamentu filosofia, sosiolojia no juridiku(Kelsen).

Iha kontekstu filosofia juridiko ita kolia kona ba lei hirak nebe mak produs tenke tuir filosofia estadu nian. Filosofia estadu nian mak konsagra ona iha konstituisaun da republika. Tuir konstituisaun da republika iha artigo 1 iha alinea 1 nebe hateten katak “A RDTL e um estadu de direito democratico .........baseando na vontade popular....” nomos iha artigo 6 nebe kolia kona ba objectivo do Estado iha alinea I nebe hateten katak “promover desenvolvimento harmonioso.....e a justa repartição do produto nacional”. Signifika sosiadade hotu fo esperansa katak normas juridica nebe mak iha bele kria justisa, estabilidade no bem estar ema hotu nian. Iha kontektu filosofia nian mos kolia kona ba objektivu ba fins do Direitu nebe esensialmente kolia kona ba diak ou la diak no justu ka la justu. Tamba ne’e mak esperansa ba lei mak atu produs tenke refleta valor justisa nebe sai hanesan valor sosiadade nian tuir konsituisaun haruka. Lei pensaun vitalisia nebe mak iha ladun iha fundamentu filosofia. Tamba esensia lei ida ne’e nakonu injustisa sosial e ekonomikamente. injustisa tamba lei ne’e la kolia intrese publiku maibe kolia deit intrese grupo elit kiik oan ida iha nasaun ida ne’e(deputadus). Ekonomikamente tamba lei ida ne’e sei hariku deit ema balu (deputadus) sira iha Timor Leste.

Tuir prinsipio fundamentais estadu nian, lei ida ne’e ladun refleta prinsipiu fundamentais tuir konstituisaun haruka hanesan iha artigo 1 alinea 1  no iha artigo 6 alinea I. Signifika katak hanesan estadu de direito demokratiko buat hotu nebe mak estadu halo tenke bazeia ba vontade povu nian laos vontade elite politiko nian. Signifika deputadus nebe hanesan representante povu tenke hatene saida mak povu nia hakarak no tau intrese komum hanesan prioridade.

Relasaun lei ida ne’e ho objektivu de estado nian la hatudu justisa iha moris sosiadede nian. Tamba iha parte ida kondisaun povu sei susar no kiak maibe iha parte ida grupo deputadus hakarak hariku nian a’an hodi halo interpretasaun nebe ladun etis ba konstituisaun. Kondisaun ida ne’e akontese tamba interpretasaun ba lei ida ne’e la ho pertimbangan etika no moral maibe ho politika no ekonomia. Signifika katak ita nia deputadus sira halo lei ida ne’e ladun iha etika legislatifu.

Wainhira lei ida iha fundamentu sosiolojia signifika lei tenke tuir kontekstu sosiadade nian hanesan lei ne’e refleta intrese publiko kalae? tamba wainhira la refleta kondisaun ou realidade sosiadade nian automatikamente lei ne’e formalmente iha maibe sosiadade la simu. Lei pensaun vitalisia ne’e ladun kolia kona ba intrese publiko maibe intrese deputadus sira nian. Maske lei ne’e iha mandatu konstitusional maibe la signifika halo interpretasaun nebe la etis. Signifika lei ida ne’e seidauk nesesita atu halo, tamba mayoria povu sei moris susar no kiak. Iha kontekstu seluk lei ida ne’e fo todan mos ba orsamentu estadu kada ano fiskal nebe halo investimentu iha seitor publik nebe relasiona ho povu nia moris kontinua la hetan atensaun. Lei ne’e mos ladun nesesita tamba kada fulan deputadus sira simu salario nebe sufisiente hodi bele sustenta nia familia nomos hetan fasilidade nebe diak husi estado. Se kondisaun ne’e kontinua akontese mak sei la kontribui hodi atinji objektivu estadu nian nebe kolia kona ba “promover a edifição de uma sociadade com base na justiça...iha alinea E konstituisaun RDTL.” Tamba ema balu kontinua hetan asistensia estado nian ho diak maibe mayoria la heten.

Tuir politika legais, lei ida ne’e iha fundamentu tamba bazeia ba konstituisaun no produs husi parlamentu nasional. Maske lei ne’e legalmente iha fundamentu maibe la signifika juridikamente ne’e los tamba maske tuir konstituisaun maibe lei ne’e labele kontra fali prisipius fundamentais no lei sira seluk nebe mak iha ona. Ou lei ne’e la kontribui hodi atinji prinsipius fundamentais sira seluk.

Iha kontektu lei pensaun vitalisia lei ne’e iha fundamentu tamba tuir konstituisaun artigo 95 numeru 2 iha alinea J nebe kolia kona ba estatuto dos deputados. Maibe tenke mos interpreta ho etis atu nune lei ne’e labele fo impaktu ba injustisa sosial no ekonomikamente moris sosiadade nian. Interpretasaun nebe mak deputadus sira halo hodi produs lei ida ne’e, deputadus sira uza generalidade konstituisaun hodi interpreta tuir intrese ekonomika deputadus nian hodi la hare intrese komum. Wainhira ita analisa didiak lei ida ne’e mos ladun kontribui ba prinsipius fundamentais sira hanesan objektivu do estadu nebe kolia oinsa promove justisa sosial no distribuisaun riko soi nasional.

Iha parte seluk artigo balu iha lei ne’e mos ladun fundamentu no kontra lei balu hanesan iha artigo 1 hateten katak “Os deputados têm direito a uma pensão mensal vitalícia igual a 100% do vencimento desde que tenham exercido o cargo, em efectividade de funções, durante 42 meses.......” artigo ida ne’e mos ladun fundamentu tamba eis deputadu nia kontribuisaun la to ona 100% no dalaruma la iha liu hanesan eis membru parlamentu balu iha legislatura hirak liu ba. Iha Artigo 3.º  nebe mak kolia kona ba Suspensão da pensão nebe mak  hateten katak “A pensão mensal vitalícia será imediatamente suspensa se o respectivo titular assumir, nomeadamente, uma das seguintes funções: a) Presidente da república; b) Membro do governo; c) Deputado; d) Magistrado judicial; e) Magistrado do ministério público; f) Provedor de direitos humanos e justiça; g) Embaixador; h) Gestor publico ou dirigente de instituto publico”. Maibe la kolia kona ba deputadu sira nebe mak hanesan veteranus. Signifika deputadus sira nebe mak veteranus sira bele simu dupla.

Iha artigo 1 alinea “b) Direito a importar uma viatura para uso pessoal, sem pagamento de taxas aduaneiras e outras imposições fiscais sobre as importações....”artigo ida ne’e mos ladun fundamentu tamba kontra fali artigo lei tributariu iha artigo 19º nebe kolia kona ba “Incidência dos direitos aduaneiros e de importação....” nebe iha artigo ne’e la kolia kona ba direito importasaun nebe eis deputadus sira halo tuir lei pensaun vitalisia haruka. La justu mos wainhira ita hakilar empresariu sira tenke selu taxa maibe hanesan orgaun legislador ida halo lei hodi la selu taxa.  

Ho argumentu hirak iha leten mak atu konklui deit katak lei ida ne’e halo ho intensaun politika no ekonomikamente maibe ladun iha fundamentu juridico. Ho argumentu hotu nebe mak iha hau hanoin deputadus sira tenke iha moral ona hodi muda lei ida ne’e atu bele kontribui ba objektivu estado RDTL tuir konstituisaun haruka.

Hakerek nain: Zenilton Zeneves

Estudante Faculdade de Direito UNTL

Peskizador Luta Hamutuk Institute