Content on this page requires a newer version of Adobe Flash Player.

Get Adobe Flash player

Politika Kombate Korupsaun (Komitmentu VS Asaun) 06 March 2013

 

 

 

KORUPSAUN nudar hahalok krime nebe mosu ho nia kompleksidade no kauza nebe mak sempre diferente, tamba ne’e maneiras ka politika atu prevene no kombate korupsaun tenke komprehensivu no integradu liu husi stratejia no aprosimasaun politika, ekonomia, sosiu no kultura nebe mak efektivu. Tamba preokupa ho konsekuensia korupsaun ba existensia estadu no sustentabilidade dezenvolvimentu iha futuru, nune korupsaun konsidera nudar Crime Extraordinariu nebe mak presiza kombate ho asaun nebe mak Extraordinariu mos, atravesa politika nebe mak komprehensivu no sistematiku. Infelismente realidade mak mosu iha Timor Leste hatudu katak asaun nebe durante ne’e Governu foti nudar asaun nebe mak ita bele konsidera asaun bai-bain deit (non-Extraordinary), nune Governu sidauk hatudu lolos komitmentu, seriedade (willingness) no vontade politika (political will) iha prosesu kombate korupsaun. Kombate korupsaun liu husi estabelesimetnu Komisaun Anti Korupsaun (KAK) ita sempre rekuiñese katak ne’e esforsu pozitivu, maibe keta haluha katak KAK laos unika no ultima solusan tamba presiza mos suporta ho komitmentu no  vontade politika (political will) governu rasik ba iha aspeitu hotu-hotu, liu-liu enkuadramentu legal / leis nudar baze legal hodi fortifika liu tan papel Komisaun Anti Korupsaun iha prosesu kombate korupsaun. Atu nune estabelesimentu KAK laos deit atu hatudu performance estadu iha mundu internasional nudar membru United Nation Convention against Corruption (UNCAC) no ADB/OECD Initiative for Anti Corruption, maibe kombate korupsaun tenke sai duni komitmentu nasional nebe materializa iha asaun konkretu ba aspeitu hotu-hotu.  

 

 

Iha konteksu kombate korupsaun, fenomena politika nebe akontese iha Timor Leste mak Korupsaun Krime Extraordinariu, maibe asaun atu Kombate Naun- Extraordinariu alias bai-bain deit. Signifika katak pratika politika nebe mak akontese iha prosesu kombate korupsaun, pelu kontrariu (bertolak belakang) ho komitmentu estadu nebe iha papel no responsabilidade ba asuntu ne’e. Rajaun tamba saida mak hau (hakerek nain) hatente nune? Tamba to’o ohin loron Governu sidauk bele kria enkuadramentu legal sira nebe importante no relevante tebes ho politika kombate korupsaun, mak hanesan Lei Anti Korupsaun, Lei Deklarasaun asset, lei pembuktian terbalik no leis sira seluk tan. Instrumentu legal hirak ne’e nesesariu duni hodi suporta KAK atu halo nia papel tuir vizaun no misaun mak define tiha ona, katak “Timor Leste Estadu demokratika ida ho kultura rejeisaun korrupsaun ida mak forte ba interese no properidade povu”. Presiza duni iha baze legal nebe mak forte hodi regula no kontrola lalaok korupsaun.

 

 

Hahu kedas husi I to’o V Governu konstitusional, korupsaun sempre konsidera nudar asuntu importante iha agenda poltiika Governu, nebe sempre mos sai komprimisiu ba politika nain sira (politikus) hodi uza nudar iska atu kail povu nia votu de konfiansa. Los duni katak, iha ona kondisaun balun nebe ita bele rekoinhese nudar esforsu ka maneiras politika hodi prenvende no kombate krime korupsaun iha Timor Leste. Hanesan iha ona Inspetor Jeral, Provedoria Direitus Humanus e Justisa (PDHJ), polisia Investigasaun, Komisaun Anti Korupsaun (KAK) no Inspektor Geral, inklui mos Sosiedade Sivil no Media nebe sai elementus importante iha prosesu kombate korupsaun.  Institusionalmente ita rekoiñese katak ne’e esforsu pozitivu hodi kombate korupsaun, maibe to’o iha nivel implementasaun, instituisaun hirak ne’e sei la funsiona ho maximu tamba sidauk iha instrumentu legal (leis) nebe sufisiente no nudar baze instituisaun. Tamba ne’e politika governu la hatudu seriedede atu prenve no kombate korupsaun.

 

 

Koalia konaba lalaok korupsaun iha estadu ida nia laran, intersante tebes atu liga asuntu ne’e ba iha sistema aprovisionamentu publiku, tamba aprovisionamentu iha instituisaun Governu sempre konsidera nudar kondisaun estruktural ba ema atu halo korupsaun (LAHAN BASAH). Alende korupsaun ne’e bele mosu husi mentalidade personal maibe korupsaun n’e mos nudar pratika sosial nebe mak akontese iha sistema ida nia laran. Signifika katak sistema ne’e rasik mak kria oportunidade ba ema atu halo korupsaun wanhira laiha sistema kontrolu nebe mak forte. Aprovisionamentu publiku nudar sistema ou mekanismu jestaun nebe  atu asegura kualidade, transparensia no akuntabilidade ba despeza no utilizasaun rekursu estadu ba prosesu dezenvolvimentu rai laran. Aprovisionamentu nudar fatin nebe mak importante tebes atu hetan kontrolu makas husi entidade estadu sira, tamba kada tinan ± 70% husi total Orsamentu Geral do Estadu sempre jere liu husi sistema aprovisionamentu publiku. Hanesan ita hotu hatene katak, iha kontekstu Dezenvolvimentu Infrastruktura rai laran, wainhira atu halo jestaun ba dezenvolvimentu fiziku sempre atravesa sistema aprovisionamentu publiku nebe estabelesidu liu hosi instituisaun sira mak kompetenten hanesan Agensia Dezenvolvimentu Nasional (CNA), Comisaun Nasional Aprovisionamentu (CNA) no Comisaun Administrasaun Fundu Infrastruktura (CAFI) nebe kompleta mos ho nia enkuadramentu legal rasik hanesan Rejimentu no Dekretu leis. Maibe fenomena korupsaun nebe mak mosu durante ne’e hatudu katak kazu krime korupsaun sempre mosu iha sistema aprovisionamentu ba supply ekipamentus no projetu konstruksaun fiziku sira mak hanesan PDD, PDL no Fundu Infratruktura nebe hetan alokasaun bot iha orsamentu annual nudar prioridade estadu.

 

 

Maske sistema aprovisionamentu ne’e estabelese ona liu husi formas oi-oin, maibe iha nivel pratika Governu rasik laiha disiplina atu haktuir sistema mak iha no sempre halo violasaun ba sistema nebe sira rasik estabelese. Nune indisplina no inkonsistensia Governu rasik mak sei kria korupsaun iha birokrasia aprovisionamentu publiku. Exemplu balun ita bele hare husi distribuisaun projetu infrastruktura no supply ekipamentus ba kontrator lokal, nasional no internasional nebe nia prosesu dala barak la liu husi sistema aprovisionamentu publiku nebe iha, maibe distribui projetu emerjensia liu husi sistema single source nebe dala barak la priense rekezitus nebe mensiona iha lei ou Rejimentu Juridiku Aprivisionamentu (JRA). Exemplu kazu konkretu mak hanesan; iha tinan 2010 Projetu emergensia atravesa single source baprojetu Konstruksaun Portu Naval Hera ho volume kontratu hamutuk Miliaun $10.3 (inklui selu multa) implementa husi Kompania kompañia Lifese Engineering Pty Ltd, to agora laiha rezuladu (failha),  iha tinan 2011 Projetu emergenia Estrada Nasional iha kapital Dili nebe nia kontratru la klaru implementa husi Consorsium National Timor Leste (CNT), iha tinan 2011 Ministra das Financas deside orsamentu hamutuk miliaun $2.1 hodi halo Projetu konstruksaun Residensia Ministra das Financas implementa husi kontrator  Nevan Construction Lda, iha tinan 2012 Ministra das Financas fo projetu emegensia ba nia kaben ho montante osan rihun atus $985.1 iha tinan 2011 liu husi Konsellu Ministru deside projetu emergensia ba konstruksaun ponte Comoro hodi fo ba kompania VIKA no CNT. Projetu hirak ne’e ita bele konsidera nudar projetu mak iha relasaun ho pratika iregularidade no mal-jestaun nebe la haktuir prinsipiu no padraun aprovisionamentu publiku.

 

 

Alende ne’e kazu hirak ne’e, iha mos indikasaun korupsaun balun nebe akontese ba iha implementasaun projetu infrastruktura iha nivel Distritu to Aldeia atravesa politika PDD 1 no 2, nebe la konsege identifika husi autoridade kontrolu sira. Tamba tuir rezultadu monitoramentu Luta Hamutuk identifika katak durante implementasaun projetu nebe uza sistema semi aprovionamentu liu husi Komisaun Dezenvolvimentu Distrital (KDD), mos mosu pratika mal-jestaun no mal-administrasaun iha prosesu adjudikasaun projetu no laiha transparante, tamba sistema kontrolu nebe mak sei fraku husi autoridade kompetente mak hanesan ADN no Ministeriu Infrastruktura, inklui mos Parlamentu Nasional nebe mak durante ne’e halao fiskalizasaun. Tamba hahu husi primeira to’o terseira lejislatura Parlamentu Nasional ladun halo nia funsaun iha kontekstu check and balance ba ezekusaun Orsamentu Geral do Estado mos, tamba dala barak Parlamentu Nasional sai fali instrumentu formal hodi legaliza politika orsamentu Governu alias stempel governu.     

 

  

Prosesu hirak ne’e hatudu klaramente katak asaun konkretu nebe Governu halo durante ne’e, pelu kontrariu no la refleta komitmentu politika estadu iha kontektsu kombate korupsaun. tamba ne’e kazu korupsaun nebe mak akontese durante ne’e nudar failansu Governu rasik, nebe mak kontribui hodi kria kondisaun nebe koruptivu iha sistema birokrasia Governu. Ikus mai Pratika ida ne’e konserteza sei la kontribui ba prosesu kombate korupsaun iha rai laran, maibe sei sai deit dezafiu no difikulta prosesu kombate korupsaun liu-liu knar Komisaun Anti Korupsaun rasik.

 

Hakerek nain:

 

 

Elio Ze’romon

Peskizador Luta Hamutuk Institute