Content on this page requires a newer version of Adobe Flash Player.

Get Adobe Flash player

“Fenomena Korupsaun iha Timor Leste” 19 February 2013

 

Wainhira ita rona katak “Ministra das Financas fo projetu emerjensia (supply ekipamentus HNGV) ba nia kaben ho valor osan miliaun $2.004.100,00, Ministra das Financas kria orsamentu $1,258,191.68 hodi halo nia rejidensia seim atravesa mekanismu aprovisionamentu, Eis Ministra Justisa tama prizaun Gleno tanba komete krime Korupsaun (falsifikasaun dokumentu nó abuzu poder), Eis Administrador Distrito Dili Sr. Ruben Braz komete krime korupsaun(deskonfia foti osan estadu hamutuk rihun atus $21.800) iregularidades nebe mosu iha Instituisaun publiku no kazu sst. Infelismente kazu korupsaun nebe mak mosu durante no publika liu husi Media Jornal no eletronika, komete duni husi ema sira nebe mak hetan konfiansa husi povu atu jere povu nia riku soin no lori povu ba moris iha prospredade, maibe ikus mai povu nia votu de konfiansa  tenke nakfilak sai fali amensa (boomerang) ba sustentabilidade moris sira nian rasik. Realidade hirak ne’e nudar fenomena nebe sai faktus konkretus hodi justifika katak pratika korupsaun buras dadauk iha Timor Leste. Nudar povu bai-bain konserta sira laiha koinhesimentu klean konaba lalaok korupsaun nune sira sempre sai instrumentu eleitoral (batu loncatan) ba politika nain sira atu uza hodi hariku-an. 

 

 

Hare husi realidade lor-loron korupsaun besik atu akontese iha nivel no aspeitu hotu-hotu, nebe hahu kedas husi sistema birokrasia governu, seitor privadu, prosesu aprovisionamentu ba projetu infrastruktura no supply ekipamentus, servisu alfandengas, rendimentu estadu nomos implementasaun lei no orden (low enforcement) nebe mak koruptivu. ema barak (povu bai-bian) sidauk hatene tuir situasaun hirak nebe mak koruptivu no akontese hela iha sira nia let. Konserteza koruptor sira sempre uza no aproveita povu nebe mak inosente hodi kontinua hetan fiar, hodi sira bele iha oportunidade nafatin atu hariku sira nia an ho osan povu nian. Hare ba realidade moris lor-loron ita sempre iha sentimentu insatifietu tanba ita bele hare ema lubuk oan mak riku ba bebeik no sei iha ema lubun bot ida mak kiak rabat rai ba bebeik. Kondisaun ida ne’e rasik tuir lolos bele sai ona lalenok ida ba ema hotu katak, injustisa sosiu-ekonomiku akontese hela tamba, konsekuensia husi korupsaun nebe buras ba bebeik. karik situasaun ne’e sei kontinua ba oin, konserteza Timor Leste nebe iha grasa rekursu mina no gas, to’o loron ruma sei nakfilak ba malisan rekursu nebe mak akontese daudauk ona iha pais sira nebe riku mina no gas.  

 

 

Korupsaun sai nudar asuntu global nebe hetan atensaun makas husi komunidade internasional nune korupsaun konsidera nudar Krime Extraordinariu tanba, Korupsaun sei afeita makas ba kredibilidade estadu, hafraku valores demokrasia, hakanek etika no pratika justisa sosial no ekonomia, hakanek integridade no soberania nasional, desvaloriza prinsipiu ukun rasik-an, destroy planu dezenvolvimentu sustentavel, hatun kualidade asistensia publiku, estraga sistema ekonomia nasional, hamosu indisplina Fiskal. Hare ba konsekuensia hirak ne’e, konserteza ita nudar Timor oan sei la tolera duni korupsaun atu buras iha rai doben ida ne’e. Fenomena sosial no ekonomia rai laran durante ne’e konsege hatudu indikasaun barak katak, virus korupsaun lao dadauk iha Timor Leste. Nebe wanhira ita la kombate urjentemente sei hamosu kiak estrutural iha rai laran nomos hamosu grupu elit nebe hetan benefisiu husi orsamentu geral do estadu, nune sei bele lori nasaun foun ida ne’e ba malisan rekursu.

 

 

Tamba ne’e korupasaun nudar attitude nebe mak presiza kombate iha prosesu dezenvolvimentu rai laran, tanba ho hanoin ida katak korupsaun sei bele prejudika funsionamentu publiku sai fraku no la funsiona tanba sei iha alokasaun no distribuisaun orsamentu nebe mak la efektivu no efisiente ba seitor prioritariu. Tanba ne’e korupsaun konsidera nudar kirme extra-ordiariu (extraordinary crime) nebe mak nakfilak an sai krime bot.

 

 

Governu Timor Leste iha Korupsaun ka lae? Wainhira ita dirije perguntas ne’e ba governante sira, hau fiar katak ita nunka atu hetan resposta nebe klaru. Maibe ita so bele hetan deit resposta katak “se imi iha provas bele lori ba Tribunal”. Resposta ne’e indika katak maske estadu iha komitmentu atu kombate korupsaun, maibe governante sira laiha vontade atu kontribui ba prosesu kombate korupsaun. Tanba atu kombate korupsaun iha estadu ida nia laran, pasu importante ida mak HONESTIDADE governante sira atu rekoihese korupsaun. Tanba wainhira laiha honestidade hanesan mos ita lakon sasan iha uma laran maibe ita nunka honestu atu hateten katak naok ten tama uma laran. Siginifika katak Governu sidauk iha vontade politika atu materializa sira nia komitmentu politika hodi kombate korupsaun.

 

 

Hakarak ou lakohi ita tenke rekoinhese duni katak governasaun durante ne’e kria hela koruptor sira nebe subar metin iha poder politiku nia kotuk. Tamba bazea ba relatoriu nebe publika husi International Transparency (Corruption Perception Index) mensiona katak Timor Leste nudar pais ida nebe mak hetan predikat korupsaun makas tanba iha ranking 113 ho score 3,0. Iha tinan 2011 Timor Leste iha ranking 143 ho score index 2,4 iha tinan 2010-2009 iha ranking 146 ho score index 2,2 no 2,5. Tamba ne’e iha tinan 2009 Millennium Challenge Corporation  kansela planu ajundus fundus ba Governu Timor Leste tanba Index Korupsaun nebe as tebes (high corruption).  

 

 

Pesoalmente hau sempre iha perguntas no duvidas bot ba vontade politika governu durante ne’e iha prosesu kombate korupsaun. Tanba durante tinan 10 nia laran iha esforsu lubuk ida mak governu halo tiha ona, maibe korupsaun kontinua buras ba bebeik.  Hanesan ezemplu ita bele hare fila fali antes Timor Leste restaura nia independensia iha loron 20 de Maio 2002, iha mandatu tranzisaun ONU nia okos (UNTAET) estabelese ona Inspektor Geral (General prosecutor) nebe ho funsaun atu halo audit, inspeksaun no investigasaun ba pratika Mal-Administrasaun no despeza orsamental, atu prevene korupsaun buras iha pais foun ne’e. kontinuasaun husi esforsu ne’e iha fulan Julho 2004 liu husi I Governu konstitusional (Governasaun Fretilin) estabelese tan Provedoria Direitus Humanus no Justisa (PDHJ) bazea ba Konstituisaun RDTL artigu 27. Nune PDHJ mosu ho dimensaun importante 3 mak hanesan; Promove Boa Governasaun, Direitus Humanus no Kombate Korupsaun. depois de instituisaun ne’e halao nia funsaun durante  tinan 5 konsege iha mudansa tanba infrenta limitasaun rekursu humanu nune iha fulan Julho tinan 2009 IV Governu Konstitusional (Aliansa Mayoria Parlamen) estabelese tan instituisaun espesifku ni independente ida nebe haknaran Comisaun Anti Corupsaun (CAC) ho misaun Prevensaun, Edukasaun no Investigasaun ba aktu korupsaun iha Timor Leste. Wainhira ita liga esforsu hirak ne’e ba realidade mak akontese dadauk ne’e, sempre mosu kontradisaun iha ita nia hanoin. Tanba prosesu hirak ne’e hatudu katak governu tenta atu hadiak sistema ba bebeik maibe korupsaun mos mosu ba bebeik. Perguntas mak ne’e; sistema ne’e rasik mak sidauk forte atu kontrola lalaok korupsaun ka ho kriasaun sistema ne’e mak konsege identifika hahalok korupsaun nebe durante ne’e subar hela? Maibe tuir hau (hakerek nain) nia pontu da vista hare’e katak Governu rasik mak sidauk iha seriedade no laiha vontade politika (political will) atu materializa nia prinsipiu no komitmentu iha kontektsu kombate korupsaun tanba, sistema nebe mak durante ne’e estabelese nudar sistema nebe formalitas no governu tenta atu hadiak nia performance iha mundu internasional. Nune la konsege trava velusidade korupsaun iha birokrasia governasaun. Infelismente sira haluha katak performance estadu Timor Leste komesa at ba dadauk tanba deit korupsaun nebe buras loron ba loron.

 

 

Los duni katak atu kombate korupsaun iha estadu ida nia laran laos buat  nebe mak fasil, maibe laos mos buat nebe mak difisil. Tanba realidade iha nasaun barak mak hatudu ona katak sira konsege kombate duni korupsaun, nebe antes ne’e sai mos nudar nasaun koruptu iha mundu. mak hanesan; Honkong, Malaysia no Singapura. Tamba ne’e importante ba Timor Leste iha prosesu kombate korupsaun mak tenke koloka asuntu korupsaun nudar kauza nasional no inimigu komun nebe tenke kombate ho honestu no boa vontade. Tamba vontade politika laos deit ba Primeiru Ministru nudar chefe do Governu maibe importante liu ba governante sira hotu mak nudar ezekutor orsamentu geral do estadu. Vontade politika tenke materializa liu husi estabelesimentu sistema no mekanismu kontrolu nebe mak forte atravesa enkuadramentu legal sira no iha seriedade ba implementasaun lei no orden LAOS LEI TUIR ORDEN.

 

 

 “Naok US$0.05 cent sai…….!” Sr. Emilia Pires bele sai husi estrutura V Governu Konstitusional?? ita espera!!

 

Hakerek nain

 

 

Elio Zeromon

Peskizador Luta Hamutuk Institute