Content on this page requires a newer version of Adobe Flash Player.

Get Adobe Flash player

LUTA HAMUTUK NIA HANOIN KONABA BA PROPOSTA ORSAMENTU GERAL ESTADU RECTIFIKATIVU (OGE) 2015 02 June 2015

 Iha VI Governu Konstitusional nebe lider husi DR. Rui Maria de Araujo hamosu proposta OGE Rectfikativu nebe mak ho objetivu atu halo alterasaun ba Lei Orsamentu no ajustamentu orsamentu annual 2015 tuir nesesidade estrutura Governu foun. Iha proposta OGE 2015 nia total despeza estimadu hamutuk Biliaun US$1,570.0 nebe gasta ba kustu Rekorente Miliaun US$1,097.0 (70%) no ba kustu Kapital hamutuk Miliaun US$472.7 (30%)[1].

 

Tabela No.1: Proposta OGE Rectifikativu 2015

Kategoria

Final Bugdet 2014

Original Budget 2015 (Inklui Rollover)

Mudansa 2015

Budget Final Rectificativu 2015

Total

1,500.00

1,570.00

0.00

1,570.00

Rekorente

992.5

1,102.10

-4.80

1,097.30

Salariu Vensimentu

176.8

179

-1.5

177.5

Bens e Servisu

480.3

516.3

0.7

517

Transf. Publika

335.5

406.8

-4

402.8

Kapital

507.5

467.9

4.8

472.7

Kapital Minor

52.1

26.1

3.7

29.8

Kapital Dezenvolvimentu

455.4

441.5

1.5

443

Reseitas Domestika

166.1

170.4

0

170.4

Non Oil Fiscal Deficit

1,333.90

1,399.60

0

1,399.60

Finansiamentu

1,334.00

1,399.60

0

1,399.60

ESI

632.3

638.5

0

638.5

Excede 3%

270.6

689

0

689

Cash Balance

400

2.1

0

2.1

Loans

31.1

70

0

70

Fontes: Rectification Budget 2015 (Pag.5)

 

  • Politika Poupasa Despeza Estadu

Tuir Luta Hamutuk nia haree konaba montante OGE Rectifikativu 2015 hatudu katak proposta VI Governu nee ladun refleta politika pouansa despeza, nebe sai komitmentu politika Primeiru Ministru foun DR. Rui M. de Araujo nian. Ami dehan la refleta tanba montante orsamentu iha kategoria Bens Servisu laiha redusaun orsamentu, maibe akontese fali aumentus husi orsamentu inisu hamutuk Miliaun US$516.3 ba fali Miliaun US$517.0 iha OGE Rectifikativu. Signifika katak proposta OGE Rectifikativu nee Governu husu aumentus orsamentu hamutuk rihun atus US$7.0 aumentus orsamentu nee hatudu katak VI Governu laiha politika nebe klaru konaba poupansa despeza no sei fo todan nafatin ba OGE estadu laiha katak laiha efisiente ba utilizasaun orsamentu estadu. Alende nee, Luta Hamutuk mos kestiona promesa PM iha publiku atu halakon item balun iha bens servisu nebe afeta ba efisiensa orsamentu, mak hanesan; halakon bibidas, hasai jileiras, redus kustu viajen estrajeiru, redus frekuensia vizita rai laran, nsst.

 

Bazeia ba kestaun nee, ami hakarak rekomenda ba Parlamentu Nasional nebe mak durante nee preokupa ho kestaun poupansa estadu, atu halo redusaun ba kategoria bens servisu no Kapital minor, atu nune OGE rectifikativu nee bele iha efisiensa. Bazeia mos ba promesa PM iha publiku konaba poupansa despeza, ami rekomenda ba PM atu atu realiza duni nia promesa liu husi orsamentu rectifikativu 2015. Tanba Luta Hamutuk konsidera promesa PM nee relevante no presiza realiza atu nune bele salva orsamentu estadu hodi labele gasta arbiru.

 

 

  • Kapasidade Ezekusaun OGE

Ami preokupa ho proposta OGE rectifikativu nebe mantein nafatin dotasaun inisiu OGE 2015 ho montante Biliaun US$1,570.0 tanba, kapasidade ezekusaun Governu sei fraku atu gasta orsamentu nebe boot. Bazeia ba rezultadu ezekusaun programa nebe relata iha Matrix Planu Estratejiku Dezenvolvimentu Nasional (PEDN) 2013[2] iha tinan 2014, hatudu momos katak Governu failla  hodi atinji metas program balun nebe define iha PEDN, liu-liu ba programa prioritariu sira mak iha seitor Agrikultura no Infrastrutura. Alende nee, rezultadu evaluasaun Governu liu husi Yellow Rood Workshop iha tinan 2014, deklara mos katak alokasaun OGE annual sempre boot maibe nia rezultadu kiik, laiha kualidade nomos taxa ezekusaun kada tinan sempre tun “2010 (91%) 2011 (83%) 2012 (66%) 2013 (65%) no 2014 (60%)”[3]. Pursentazen ezekusaun nebe tun kada tinan, ita bele nota ona katak kapasidade Ministeriu sira sidauk sufisiente atu absorve numeru orsamentu nebe boot no aumenta kada tinan.

 

Signifika katak Governu presiza duni atu hadiak kapasidade ezekusaun hodi nune bele asegura kualidade ezekusaun nebe maximu no bele fo impaktu ba povu tomak. Hanesan ita hotu hatene katak kestaun de kapasidade ezekusaun nudar asuntu nebe mak durante nee sai preokupasaun husi entidade balun inklui sosiedade sivil, tanba rezutadu ezekusaun kada tinan hatudu katak implementasaun programa husi kuatru Governu to kintu Governu sidauk bele lao tuir espetasaun publiku.

 

Iha OGE Rectifikativu 2015, VI Governu propoin atu halo redusaun iha kustu rekorente ba kustu capital ho total aumentu hamutuk US$4.8 miloes. LH preokupa ho aumentus ida nee tanba kapasidade ezekusaun OGE nebe fraku kada tinan no sidauk hatudu dezepenu servisu diak ba publiku. Alende nee, relasiona ho servisu governasaun iha tinan 2015 nebe mak sei foku ba reformasaun servisu instituisaun publiku nian, klaru katak Governu sei laiha posibilidade tempu nebe naton atu halo ezekusaun programa ho efetivu ho orsamentu nebe boot.

 

Bazeia ba preokupasaun hirak nee, Luta Hamutuk hakarak rekomenda ba PN atu halo alterasaun ba Proposta Lei No.OGE 2015 hodi konsidera nafatin Regras komplementar Ezekusaun orsamentu nebe regula iha Lei OGE 2014 (artigu 8) anu anaterior. Atu nune bele iha sistema nebe bele kontrola ba utilizasaun orsmentu tuir kapasidade Governu.  Iha Pontus 2 mak ami hakarak rekomenda ba PN atu konsidera iha Lei OGE Rectifikativu 2015 mak hanesan; Se, to’o final terseiru trimestre, ezekusaun orsamental atinji 75%, Governu bele buka halo transferênsia husi Fundu Petrolíferu ne’ebé bot liu Rendimentu Sustentável Estimadu, maibé tenke informa uluk-lai ba Parlamentu Nasional no asegura rezerva ida ne’ebé ho valor tokon $200 iha Konta do Tezouru” no “Kazu, durante terseiru trimestre, bele prevê katak tasa ezekusaun orsamental to’o tinan remata bele menusde 80%, tenke rectifika Orsamentu, hodi hamenus respetivu montante total, entre fulan Jullu no Setembru”[4]. Artigus hirak nee ami konsidera nudar instrument legal nebe forte atu bele kontrola ezekusaun orsamentu.

 

 

  • Sustentabilidade Fiskal

Prosesu planeamento no implementasaun OGE kada tinan durante nee, hatudu katak Governu rasik koloka futuru estadu ba iha risku boot tanba Governu la konsege kria politika orsamental ida nebe mak bele asegura sustentabilidade fiskal iha futuru oin mai. Pratika fiskal nebe akontese hanesan violasaun ba regras fiskal, laiha disiplina fiskal, planeamentu laiha baze, kualidade despeza nebe mukit no fo la fo impaktu direita ba povu nsst, konserteza sei sai ameansa boot ba sustentabilidade fiskal no futuru jerasaun.

 

Hanesan ita hotu hatene katak rezultadu Yelow Road Worshop (YRW)nebe halao  iha fulan Maio 2014, hamosu rezultadu pozitivu tanba Governu rasik konsege detekta errus barak mak akontese durante iha prosesu planu orsamentu annual, tanab despeza atual durante nee nomos planu despeza ba future la lao tuir ona estratejia despeza nebe define iha PEDN 2030. Alende nee, governu mos promote atu hadiak sistema fiskal iha tinan 2015 tanba ho razaun katak “pratika despeza durante ne’e laiha displina fiskal no laiha sustentabilidade fiskaL”. Nune ba futuru planu orsamentu hotu-hotu sei bazeia ba Sustentabilidade fiskal, Kapasidade ezekusaun, Kualidade despeza no Kapasidade ekonomia atu absorve.

 

Atu asegura sustentabilidade fiskla, tuir lolos TL durante nee iha ona meknismu nebe forte no transparante nebe ita temi Lei Fundu Petrolifera, nebe ho espiritu atu asegura sustentabilidade reseitas mina no gas hodi bele benefisia jerasaun ohin nomos jerasaun futuru. Infelismente iha nivel pratika Governu ladun konsidera Lei Fundu Petrliferu tanba sempre foti osan liu Rendimentu Sustentavel Estimadu (RSE 3%). Luta Hamutuk kestiona proposta OGE rectifikativu 2015, tanba Governu mantein nafatin montante orsamentu inisiu nebe hamutuk Biliaun US$1,570.0. nebe finansiamentu husi reseitas fundu minarai hamutuk Biliaun US$1,327.5 ( 84.5%) nee nafatin exede RSE 3%. Signifika katak OGE Rectifikativu nee la hatudu disiplina fiskal no Governu sei kontinua kontinua halo repitasaun errus iha pasadu no politika rasik sei fo amensa ba sustentabilidade fiskal nebe mak ita hotu preokupa.

 

Husi kestaun hirak nebe ami mensiona, hakarak rekomenda ba Parlamentu Nasional no Governu atu konsidera asuntu Sustentabilidade fiskal, Kapasidade ezekusaun, Kualidade despeza no Kapasidade ekonomia atu absorve nudar nudar baze hodi debate no deside Proposta OGE Rectifikativu 2015 nian.

 

  • Indikador foun “new measure” iha OGE rectifikativu 2015

Iha proposta OGE Rectifikativu 2015, VI Governu hamosu 17 programa / indikador foun “new measure” nebe sei gasta orsamentu hamutuk miliaun US$25,048 husi total redusaun miliaun US$47.5. Tuir Luta Hamutuk nia observasaun ba programa / indikador foun nebe mensiona iha proposta nee, iha programa balun nebe mak la nesesariu / laos prioridades ba Governu atu halao iha tinan 2015. Exemplu mak hanesan; Programa Sosializasaun asuntu Tasi Timor ba Comunidade Australia ho orsamentu atus rihun US$750.0, Programa interkamibiu veteranus husi Timor Leste ba Australia ho orsamentu rihun atus US$150.0, Programa konferensia Nasional Estatistika ho orsamentu rihun atus US$150.0 no programa selebrasaun 500 anos Oe-Cusse ho orsamentu hamutuk miliaun US$1.500  Alende nee, programa hirak nee mos la refleta komitmentu VI Governu sobre efisiensia no efikasia utilizasaun orsamentu. Tuir lolos orsamentu nee bele uza hodi finansia programa balun nebe mak importante liu, emergente no iha relasaun direita ho povu nia vida moris, liu-liu komunidade sira nebe iha area rurais.

 

Iha parte ida nee, Luta Hamutuk rekomenda ba Parlamentu nasional no Governu atu define didiak programa prioritariu sira nebe mak alinha  duni ho PEDN 2013, liu-liu iha seitor sira mak hanesan Infrastrtura bazika, edukasaun, saude, agrikultura, kooperativa, no seluk-seluk tan. Tanba rezultadu monitorizasaun Luta Hamutuk durante nee ba progresu dezenvolvimentu nivel komunidade hatudu katak komunidade sira iha nivel rurais barak mak sidauk bele sente benefisiu husi dezenvolvimentu durante nee.

 

  • Programa Dezenvolvimentu Komunitariu PNDS

PNDS nudar programa nebe mak Luta Hamutuk konsidera diak no importante tebes ba dezenvolvimetnu sosiu-ekonomiku komunidade sira iha nivel rurais. Tanba PNDS nudar programa nebe nia prosesu planemaentu “Bottom-Up, iha inkluzaun sosial, iha balansu generu, transparante no partisipativu. Maibe haree ba ajustamentu program no orsamentu iha VI Governu liu husi proposta OGE rectifikativu 2015 nee, hatudu katak Governu liu husi Ministeriu Planeamentu e Investimentu Estratejiku iha tinan 2015 kansela Fundu Infrastrutura PNDS ba Suco nebe hamutuk Miliaun 17.845 iha kategoria Transferensia Publika.

 

Tuir LH nia haree katak kanselamentu Fundu Infrastrutura PNDS nian nee sei fo impaktu ba komunidade sira iha Suco, tanba Suco barak mak halo ona preparasaun (Kria Ekipa Jestaun Suco, Identifika ona prioridades infrastruturta no sosializa ona ba komunidade) hodi implementa programa PNDS nee. Kanselamentu programa PNDS nee Luta Hamutuk konsidera nudar impedimentu ba distribuisaun orsamentu ba komunidade nivel rurais, nebe sei sente dook / sidauk sente benefisiu husi dezenvolviementu rai laran.

 

Bazeia razaun hirak nee, Luta Hamutuk hakarak rekomenda ba Parlamentu Nasional atu rezeita proposta alterasaun orsamentu Fundu Infrastrutura PNDS nian, hodi nune program PNDS bele implementa nafatin tuir planu nebe prepara ona husi kada Suco, nune bele responde kestaun infrastrutura nebe komunidade sira sempre enfrenta lor-loron. 

 

 

  • Dezenvolvimentu  Seitor Naun Petrolfeira

Maske Governu deklara katak iha period 2007-2012 kresimente PIB naun-petrolíferu nee exepsional tebes, maibe taxa kresimentu nee sidauk bele fo impaktu signifikativu ba ekonomia rai laran no ba dominasaun setor petroliferas iha finansiamentu estadu. Bazeia ba projesaun Governu konaba Taxa kreismentu husi tinan 2012-2015 nebe tun makas (5% to 7%), indika katak dezenvolvimentu iha seitor naun petrolifera durante nee laiha progresu.  Iha proposta OGE rectifikativu hatudu klaru katak deficit orsamentu sei kontinua boot nafatin (89.1% = Biliaun US$1,399.6), tanba kapasidade reseitas naun petrolifera kiik tebes (10.9% = Miliaun 170.4), nebe la sufisiente atu finansia nesesidade dezenvolvimentu rai laran nebe ambiosu tebes.

 

 

Defisit iha seitor naun petrolifera nee indika katak durante tinan barak nia laran, Governu la konsege dezenvolve seitor naun-petrolifera nudar seitor sustentavel nebe presiza reforsa hodi bele redus dependensia Timor Leste ba Fundu Minarai nebe sempre boot ba bebeik no implika mos ba estimasaun rendimentu sustantavel iha futuru.  Alende nee, ho taxa kresimentu reseitas husi seitor naun petrolifera nee, hatudu katak laiha serteza ida ba ita  atu bele atinji metas dezenvolvimentu nebe defini iha PEDN katak Timor Leste sei sai nasaun nebe ho rendimentu mediu altu tinan 2030, pior liu wainhira produsaun mina no gas iha Tasi Timor nebe ita depende ba komesa menus.

 

Bazeia ba preokupasaun hirak nee, Luta Hamutuk hakarak rekomenda ba VI Governu ida nee atu tau prioridadade nafatin ba diversifikasaun ekonomia iha seitor naun petrolifera nebe sustantavel mak  hanesan seitor Agrikultura e Peskas (hasai kualidade produsaun hodi limita dependensia produtu importasaun), seitor turismu (presiza hadiak programa no jestaun, hasai kreativiade programa turismu, dezenvolve seitor potensial sira no jestaun), seitor ekonomi alternative (ekonomia kooperativas), seitor Administrasaun fiskal ( reve lei tributaria hodi bele Hadia’ reseitas husi impostus/fiskais) no Agensia Autonomus (hadiak sistema kontrolu hodi bele aumenta reseitas ba estadu) .

 

 

 

 

 

Dili, 26 Marsu 2015

 

 


Mericio “AKARA”

Diretor Ezekutivu Luta Hamutuk



[1] Rectification Budget 2015 (Pag.5)

[2] Matrix Planu Estratejiku Dezenvolvimentu Nasional 2011-2030

[3] Presentation of Yellow Road Workshop 2014 (29-30 Maio 2014)

[4] Lei No.13/2009, Orcamento e Gestão Financeira, (Pag.3670), Serie I,No.37