Content on this page requires a newer version of Adobe Flash Player.

Get Adobe Flash player

Submisaun ba Lei Orsamento Geral do Estado 2015 25 November 2014

Autor:

 Mericio Akara, Zenato no Grupo Studu Juridico Luta Hamutuk

 

Bazeia ba Direito konstitusional Timor Leste orsamento Geral do Estado elabora husi Governu no aprova husi Parlamentu nasional, nebe konstitusionalmente tenke iha sentido efisiensia no efikasia. Sentido ida ne’e konstitusionalmente iha konstituisaun Timor-Leste artigo 145 numero 2 CRDTL hateten katak “Lei ba orsamentu tenke preve, ho baze iha efisiénsia no efikásia........”

Hare ba lei orsamentu Geral do Estado 2015 iha preamblu lei ida ne’e hateten katak total orsamentu ba tinan 2015 nian total hamutuk 1,570,000. Husi total orsamentu ida ne’e sei aloka ba kategoria orsamento hanesan tuir mai ne’e:

 

1)      Salario e vencimento: $ 184,051 milhoes

2)       Bens e serviço: $ 504,672 milhoes

3)      Transferensia publica: $ 340,255 milhoes

4)      Capital menor: $ 36,713 milhoes

5)      Capital dezenvolvimento: $ 504,309 milhoes

Fontes husi total orsamentu hirak ne’e mai husi fundu petroliferu hamutuk 638,5 milhoes nebe koresponde RSE no foti liu RSE hamutuk $ 689 milhoes. Alem de orsamento husi fundu petroliferu fontes seluk mak hanesan $ 70 milhoes husi credito publico no 2,1 milhoes saldo transitado husi fundu dezenvolvimento kapital humano.

 

Husi orsamento Geral hirak ne’e Governu sei legaliza ho lei orsamento 2015 nebe propoin ona Parlamento hodi halo diskusaun no aprovasaun. Hanesan sociadade civil Luta Hamutuk hakarak mos fo nia opinaun balu ba lei orsamento 2015 ne’e. opinaun ami nia ba proposta lei ida ne’e mak hanesan tuir mai ne’e:

 

Capitulo I

 
Artigo I

Definições e Aprova


Artigo I iha kapitulo ida ne’e fo definisaun ba kategoria de despesa ho montante orsamento nebe mak Governu sei propoin ba Parlamento Nasional. Iha artigo ida ne’e, ami identifika katak iha kategoria orsamento transferensia ho montante 9,924 milhoes ba zona economica especial social Mercado-ZEESM la koresponde ba mandatu konstitusional nebe konsidera oecusse hanesan regiaun autonoma. Ho hanoin ida ne’e, ami propoin ba Parlamentu Nasional atu muda kategoria orsamento ida ne’e ba iha kapitulu VI hanesan fundos autonomas. Tamba ami identifika katak wainhira ita remete ba lei jestaun finanseira Artigo 27 º. Especificação do orçamento dos serviços e fundos autónomos no lei ZEESM Artigo 10.º no Artigo 10.º iha argumento hodi muda orsamento ida ne’e ba fundo autonomas. 


Institusionalmente ami mos observa lei ida ne’e ladun los tamba tuir artigo 4.º lei ZEESM nebe kolia kona Tutela hateten katak “O Governo, na pessoa do Primeiro-Ministro, exerce tutela sobre os órgãos regionais executivos, que consiste no poder de controlar e fiscalizar a sua atividade administrativa”. Signifika katak institusionalmente nia tutela ba Primeiro Ministro nebe sei halo kontrolo no fiskalizasaun direita ba implementasaun projektu ZEESM laos tutela Ministeriu da Presidencia da Conselho de Ministro.

 

Capitulo II

Receitas

Artigo 3

Impostos e Taxas


Artigo 3.º iha kapitulu ida ne’e kolia kona ba imposto e taxas, maske ita iha ona lei ba artigo ida ne’e liu husi Lei numero 8/2008, de 30 de junho ou Lei tributaria. Maibe tuir ami nia resultado peskiza hatudu katak implementasaun lei ida ne’e seidauk implementa ho masimu tamba ne’e mak implemetansaun lei ida ne’e la konsege kontribui ba resitas domestika. Ho razaun tamba kontribuisaun reseitas domestika liu husi taxa no imposto ba OGE kada tinan la iha progresu. Kontribuisaun reseitas domestika husi imposto no taxas kada tinan kontribui deit 10-15% ba OGE. ho kondisaun ida ne’e ami rekomenda ba Parlamento atu halo fiskalizasaun ba implementasaun lei tributaria atu nune implementasaun lei ida ne’e bele iha impaktu positivo ba reseitas domestika.

 

Capitulo III

 

Iha kapitulu ida ne’e kolia kona ba “Autorização para transferencia do Fundo Petrolifero” artigo iha kapitulu ida ne’e kolia kona ba “limite autorizado para financiamento do OGE” nebe bazeia ba artigo 8 lei fundu petrolifero. Ho fundamento juridico ida ne’e transferensia husi fundu petrolifero iha tinan 2015 husi fundu petrolifero hamutuk $ 638.5 milhoes nebe koresponde ba RSE no foti liu RSE hamutuk 689,0 milhoes husi fundo Petrolifero. Luta Hamutuk nia observasaun katak Governu halo transferensia liu RSE ne’e legalmente iha fundamento tamba, artigo 9 lei fundo petrolifero fo dalan. Tamba ne’e liu husi karta Governu nia ho N.° Ref 1479 GPM/X/2014 ba Parlamento Nasional hateten katak Governu halo transferensia liu RSE ba orsamentu geral do Estado 2015 tamba, atu finansia implementasaun Planu Strategiko Dezenvolvimento Nasional (PEDN), liu-liu investimentu iha infrastruktura.

 

Legalmente Governu iha razaun hodi halo transferensia liu RSE maibe argumentu Governu nia hodi halo transferensia liu RSE kada tinan nebe mak Governu argumentu liu sira nia karta ba Parlamentu mak ladun iha fundamento. ho razaun tamba hahu husi 2011-2014 governu halo ona transferensia hamutuk Biliaun US$4.182,8 inklui foti liu RSE 3% hamutuk Biliaun US$1.421,2. Maibe iha karta Governo la esplika retornu investimento husi transferensia liu RSE husi Fundo petrolifero hodi investe iha orsamento Geral do Estado durante tinan hirak nebe ami refere iha leten.

 

Tamba la iha esplikasaun klaru ba returno investimento husi transferensia liu RSE nebe logikamente la konvensido maske legalmente iha dalan ba Governu hodi halo transferensia. Tamba bazeia ba resultado investimentu hatudu katak seitor riil hanesan infrastruktura seidauk resolvido, seitor agrikultura no turismo seidauk bele kontribui masimu ba reseitas domestika hanesan seitor rill. Desenvolvimento edukasaun nebe mak hanesan baze ba dezenvolvimento rekursu humano mos la dezenvolvido, tamba ne’e Timor Leste sei infrenta menus rekursu humano em termos kualidade no kuantidade. Wainhira kondisaun ida ne’e akontese, ami hanoin katak sei la kontribui ba sustentabilidade fiskal no jestaun nebe mak efikas ba rekursus petrolifero nebe sai hanesan objetivu lei fundo petrolifero.

 

Allem de ida ne’e ami mos argumenta katak razaun Governu foti liu RSE ladun prudente ona tamba kondisaun reserva husi kampu rua nebe mak durante ne’e fo reseitas ba fundo petrolifero komesa menus. Hanesan iha kampo Kitan iha inisiu(2012) produsaun atinji 36.000 –46.000 brl/loron ida maibe produsaun komesa menus too 5,000 brl/loron ida. Kampu Bayu Undan nebe durante ne’e mos fo reseitas boot liu ba fundo petroliferu mos komesa menus hanesan iha inisiu nivel produsaun bele atinji 90.000 – 110.000 brl/d maibe agora menus ona ba 60.000-86.000 brl/loron ida.

 

Nune mos wainhira ita hare ba folin mina mundial agora ho governu nia planu foti liu RSE nee la produnte ona tamba folin mina agora maijumenus US$ 77,18/baril (http://oil-price.net/ 2014.11.12). Razaun seluk mos reseitas husi investimento fundu petrolifero mos depende ba kondisaun merkado finanseira, hanesan tuir dadus Banco Central Timor Leste katak reseitas Petroleum iha semester ida ne’e tun ba Milaun US $ 500,00 tamba kondisaun merkado asaun nebe menus. 


Ita hotu hatene katak Governo halo transferensia iha tinan hirak nia laran sempre liu RSE maibe kapasidade hodi exsekuta orsamento hirak ne’e, ami identifika katak Governu kontinua hatudu inkapasidade tamba iha tinan hirak nia laran kapasidade Governo hodi exsekuta OGE menus 70%. A’at liu tan mak inkapasidade Governu hodi exsekuta orsamento infrastruktura nebe Governu konsidera hanesan seitor stratejiku iha dezenvolvimento. Por exemplo alokasaun orsamento ba infrastruktura husi tinan 2004 to’o 2014 hamutuk biliaun $ 3.6 Governu iha kapasidade bele exsekuta deit Biliaun 2,1.

 

Ami mos observa katak investe ona biliaun $ 2.1 maibe 80% kondisaun estrada no ponte iha kondisaun a’at. iha seitor bee moos kuaze 75% komunidade seidauk asesu ba bee moos nebe mak kaulidade nomos kondisaun infrastruktura no fasilidade eskola la favoravel hodi halao prosesu aprendizazen.

 

Capitulo IV


Constituição de divida publica, Parcerias Publico-Privadas e Garantia


Artigo 5

Montante maximo de endividamento autorizado

 

Iha numero 1 artigo ida ne’e hateten katak nesesidade halo dividas tamba atu dezenvolve seitor infrastruktura nebe konsidera hanesan strategiko ba dezenvolvimento pais nian. Tamba ne’e Governu sei kontinua halo dividas externa to’o montante 260 milhoes de dolares ho prazo tinan 40 nia laran. Ami hanoin katak inkapasidade Governo nia hodi halo exsekusaun ba orsamento dividas mos la iha, tamba iha tinan 2014 governo halo dividas maibe la exsekuta orsamento hamutuk 11,1 milhoes. Ho inkapasidade governu, ami propoin katak Governu la presija halo divida to’o 260 milhoes tamba Governo la iha kapasidade hodi exsekuta orsamento dividas. Maibe wainhira Parlamento Nasional kontinua aprova; ami propoin ba Parlamentu Nasional tenke halo kontrolo nebe mak rigorozo atu nune orsamento dividas bele fo impaktu ba povu.

 

Iha kapitulo ida ne’e ami mos identifika katak anexu IV nebe kolia kona ba dotasaun orsamentais para 2015 do fundo das infrastruktura iha programa emprestimos; ho programa de dezenvolvimento regiao Oecusse ho total orsamentu ba 62,461 ba kapital dezenvolvimento. Ami propoin ba Parlamentu atu koloka orsamento programa dezenvolvimento regiaun Oecussi ho montante orsamentu ida ne’e integra ba klusula nebe ami propoin iha iha kapitulo VI kona ba fundos autonomas nebe preve linha Orsamento ZEESM.

 

Capitulo V


exsecução orsamental


artigo 7

Regras complementar de exsecução orsamental


Iha capitulo no artigo ida ne’e Luta Hamutuk hakarak propoin tan clausula balu iha artigo ida ne’e bazeia ba prinsipios boa Governasaun(transparansia, akuntabilidade no partisipasaun publiko). Klausula nebe mak ami propoin mak tenke iha alinea balu nebe kolia kona ba publikasaun kontratu hotu nebe mak liu ona prosesu tender iha portal Governu nian. tamba durante ne’e Governu la publika dokumento kona projektu nebe mak liu ona prosesu tender iha portal Governo nian hanesan portal aprovizionamento no portal transparansia.

 

Maske iha ona resolução do Parlamento Nacional n.º 12/2010 de 19 de Maio maibe, juridikamente seidauk sufisiente hodi exsekuta politika dezenvolvimento nebe sensivel ba genero atravez exsekusaun OGE. tamba politikamente iha forsa maibe juridicamente ladun iha forsa legal hodi obirga komprimento Governo no seitor privado hanesan parseiro Governo iha proseso exsekusaun orsamento. Ho hanoin ida ne’e maka, ami propoin ba parlamento atu iha klausula ida tan kona ba planu no exsekusaun orsamento hotu tenke iha sensibilidade genero. Wainhira iha klausula ida ne’e ami hanoin katak bele garante exsekusaun orsamento hotu iha sensibilidade genero nebe ikus mai dezenvolvimento justo ema hotu sem diskriminasaun genero.

 

Capitulo VI


Serviços e Fundos autonomas e fundos especiais

 

Iha kapitulu ida ne’e ami observa katak la iha klausula ida mak kolia kona ba orsamento propria ba ZEESM hanesan projektu piloto ba regiaun autonomas tuir mandatu konstituisional no lei ZEESM iha Artigo 10.º kona ba Autonomia financeira e orçamental. Tamba la iha previzaun klaru ba orsamento ZEEMS, institusionalmente tutela fali ba Ministeriu de Estado da Presidencia do Conselho Ministro, maibe ida ne’e konstitusionalmente ladun los. Tamba ne’e ami propoin ba Parlamentu Nasional atu muda orsamento transferensia ho montante 9,924 milhoes aloka ba iha kapitulu ida ne’e hanesan fundus autonomas.

Iha capitulo ida ne’e kolia kona ba fundos autonomas no iha anexo III nebe kolia kona ba serviços fundos autonomas nian, maibe ami hare katak anexo nee seidauk kompleto tamba la iha esplikasaun kona ba TIMOR GAP–Timor Gás & Petróleo, E.P nebe tuir artigo 2.° Natureza e tutela sectorial alinea primeiro hateten katak A TIMOR GAP, E.P., tem a natureza de empresa pública e é tutelada pela Secretaria de Estado dos Recursos Naturais.

 

Maske tutela ba Ministeriu Petroleum no Rekursu Naturais maibe ami hanoin katak nee hanesan empresa publiko tenke iha esplikasaun detailhus kona ba transferensia orsamento husi Minsiteriu Rekursu Naturais atu halo despezas ba saida deit no sei fo reseitas hira ba estado hafoin investimento OGE hirak ne’e. tamba ami identifika no hare katak la iha esplikasaun klaru iha linha orsamento ministeriu do Petroleum e Recursos Naturais nebe Governu anexa iha lei ida ne’e(Lei OGE 2015).

 

Alem de ida ne’e tamba mos ita nia komprimentu ba prinsipios EITI nian nebe dala barak ita ejiji kompania internasional sira tenke iha transparansia no akuntabilidade maibe ita nia kompania mina rasik la iha transparansia no akuntabilidade. 


Iha kapitulu ida ne’e mos ami la hare espliksaun ida kona ba Autoridade Nacional do Petróleo (ANP). Tamba bazeia ba lei ANP nia iha Artigo 1.º nebe kolia kona ba Natureza iha alinea 1. hateten katak “A Autoridade Nacional do Petróleo (ANP), é uma pessoa colectiva de direito público, na modalidade de Instituto Público, detentora de personalidade jurídica, autonomia administrativa e financeira, orçamento e património próprio, submetida ao regime de administração financeira dos orgãos autónomos auto-financiados ......”., se hare ba natureza ANP ida ne’e hatudu katak ANP mos hanesan instituisaun publico nebe hetan finansiamento husi orsamento Geral do Estado maibe la iha esplikasaun klaru relasiona ho orsamento ba ANP nian. tamba ne’e ami propoin ba Parlamento atu husu governo atu tau instituisaun publiko rua ne’e nia orsamento iha anexo III. Ho hanoin katak Parlamento Nasional no publiko bele tau matan ba alokasaun no reseitas orsamento husi instituisaun publiko rua ne’e.

 

Ikus mak ami atu hateten katak, kada tinan Governo investe orsamento fundu petrolifero sempre sae no foti liu RSE maibe kapasidade exsekusaun orsamento Governo kada tinan la iha mudansa kontinua hatudu inkapasidade. Ho kondisaun ida ne’e, ami hanoin katak komprimentu lei orsamento ida ne’e konstitusionalmente sei la atinji objektivu konstitusional nebe mak konsagra ona iha artigo 145 numero 2 CRDTL hateten katak “Lei ba orsamentu tenke preve, ho baze iha efisiénsia no efikásia........”. tamba ne’e ami kontinua ejiji ba Governu hadia nia kapasidade exsekusaun Orsamento Geral do Estado hodi bele kumpri mandato konstitusional ba lei orsamento.

Posted by, Luta Hamutuk