Content on this page requires a newer version of Adobe Flash Player.

Get Adobe Flash player

Submisaun Luta Hamutuk: “Projetu Lei Proposta Orsamentu Jeral Estadu 2012” 28 January 2012


Sua Excelensia:

Presidente Comisaun “C” - Economia, Finansas no Anti Corrupsaun

Membro Comisaun “C” Parlamento Nasional

Distintos membro Parlamento Nasional RDTL

Timor Leste

 

 

Proposta Orsamentu Jeral Estadu (OJE) 2012 hato’o ba Parlamentu Nasional iha dia 30 Setembro 2011 ho montante estimadu despezas hamutuk US$1,763.4 mil milhões de dólar americanos, kuaze besik biliaun 2 kompara ho orsamentu tinan sivil 2011 hamutuk US$1,306 mil milhões de dólar americanos. Orsamentu tinan ne’e sae signifikadu teb-tebes no kuaze reprezenta 35% kompara iha tinan 2011 ne’e.  Ho hanoin katak, orsamentu mak bo’ot no sae signifikadu tebtebes bele rezolve mos problema nasional lubuk ida ne’ebe povu infrenta dadaun.

 

Tuir Luta Hamutuk nia monitoring no observasaun durante ne’e, ne’ebe hala’o pasifikamente iha aldeia, suco no distrito descobre preokupasaun oioin konaba orsamentu tinan 2011 nian, povu rasik dehan katak sira seidauk senti nia impaktu, maske ita hotu hatene katak despeza orsamentu aumenta bo’ot kada tinan husi kedan iha 2006 no seidauk konsege rezolve problema kiak nia abut no pior liu tan mak povu maioria nia moris kiak ba beibeik iha grupu ki’ik-oan ne’ebe hatudu moris diak. Preokupasaun ne’e mosu tanba aihan karun ba beibeik no povu laiha kbi’it ona atu sosa, povu komesa konsumu akar fuik, bee-mos no sanitasaun laiha, estrada nakonu ho rai rahun, transporte publiku karun, fasilidades escola barak mak falta, postu saúde barak mak la funsiona, mini merkadu barak mak la utiliza tanba laiha planu mak diak, irrigasaun ladiak nune’e produsaun aihan rai laran fraku tebes no kondisaun uma povu nian mak sei do’ok husi estandarte ne’ebe espekta husi objetivu dezenvolvimentu millineu 2015 nian, maske tinan 2011 aloka osan hamutuk US$65 milhões de dólar americanos atu hari’i uma no sanitasaun ba povu maibe to’o agora seidauk implementa.

 

Programa hadia kondisaun infrastruktura, liu husi fundus infrastruktura iha proposta OJE tinan fiscal 2012 governu aloka osan hamutuk US$746,161 milhões. Signifika iha aumenta bo’ot kompara ho tinan fiscal 2011 nian hamutuk US$599,306 milhões deit. Luta Hamutuk hanoin katak bainhira husu aumenta osan, presiza aprezenta relatoriu kompletu hodi hatudu ninia metas mak atinzi ona, nune’e ita bele sukat ninia progressu no impaktu husi investimentu ida ne’e.

 

Programa ida ne’e hanesan kontinuasaun husi pakote Plano Estratejiku Dezenvolvimentu Nasional (PEDN), maibe laiha road map ida mak sai matadalan ba fundus espesifiku, inklui mos fundus ba dezenvolvimentus kapital humanu ho montante osan hamutuk US$30 milhões iha tinan 2012 no dividas publicas/ imprestimus. Luta Hamutuk ejiji ba Parlamentu Nasional atu husu governu hodi aprezenta relatoriu exekusaun no tenki halo audit bainhira atu husu orsamentu foun no antes lori ba plenária hodi diskute. 

 

APRESIASAUN JERAL

 

Makro ekonomiku no inflasaun iha rai laran

Kresimentu ekonomia ne’ebe governu hatudu avansa teb-tebes ho projeksaun duas digitu kada tinan komesa husi 2008 (12,7%), 2009 (12,9%), 2010 (8,5%), 2011 (10%) no iha tinan 2012 sei mantein ho duas digitu (10,9 %) maibe tuir kedan ho inflasaun ne’ebe mak to’o 8%.

 

1. Kresimentu ekonomiku hanesan komparasaun real aktividades ekonomiku (Gross Domestic Product/ GDP) husi tinan ida ne’e ho tinan uluk, no variabel husi GDP  mak;  konsumpsaun rai laran, investimentu, despeza publiku no exportasaun. Bazeia ba variabel hirak ne’e, ami konklui katak kresimentu ekonomia ne’ebe sa’e maka’as tanba despeza publiku/ estadu ne’ebe bo’ot ba beibeik kompara ho tinan liuba.  Iha kontextu Timor Leste, konsumpsaun no despeza publiku (despeza korrente) sae maka’as husi tinan 2006 to’o 2011 total hamutuk 63%, liu US$2,435 mil milhões de dólar hodi gasta ba iha aumenta salariu, bens e servisu, kapital minor  (sosa kareta, motor, gerador, etc.) no transferensias mak barak liu kompara ho investmentu no exportasaun (despeza kapital - infrastrutura).

 

Tanba-ne’e, maske kresimentu ekonomika dehan sae  duas digitu maibe fundasaun ekonomia sei fraku teb-tebes no la sustentável. Nune’e bainhira estadu menus osan (Ezemplo: osan iha Fundo Petróleo hotu ona) entaun sei akontese krize fiskal no ekonomia ne’ebe bo’ot tebtebes tanba kontribusaun impostu husi produsaun rai laran ne’ebe sei ki’ik liu. Ami hakarak dehan katak tinan-tinan, impostu husi rai laran so bele kontribui to’o deit 10%, iha proposta OJE 2012 impostu husi rai laran (domestiku) kontribui 8%.  Impostu ne’e rasik labele atu finansia despeza salariu e vensimentu.

 

Tabela kresimentu real GDP (%)

Countries

Actual

Projection

 

2008

2009

2010

2011

2012

China

9.6

9.2

10.3

9.6

9.5

Australia

2.6

1.3

2.7

3.0

3.5

Singapore

1.5

-0.8

14.5

5.2

4.4

ASEAN-5

4.6

1.7

6.9

5.4

5.7

Indonesia

6.0

4.6

6.1

6.2

6.5

Vietnam

6.3

5.3

6.8

6.3

6.8

Philippines

3.7

1.1

7.3

5.0

5.0

Thailand

2.5

-2.3

7.8

4.0

4.5

Malaysia

4.7

-1.7

7.2

5.5

5.2

Timor-Leste

12.7

12.9

8.5

10.0

10.9

Fontes: Livru 1 Proposta OJE 2012. Tabela ida ne’e hatudu kresimentu ekonomi Timor Leste ne’ebe sae maka’as kompara ho nasaun riku sira.

 

Fenomena kresimentu ekonomiku Timor Leste hanesan ema ekonomista sira bolu “catch-up effect” – nasaun sira nebe komesa husi kiak nia kresimentu sei sae maka’as liu kompara ho nasaun sira ne’ebe riku ona. Iha kondisaun ne’ebe kiak, osan hira deit, liu-liu orsamentu ne’ebe bo’ot hanesan iha Timor Leste ne’ebe ho gasta no gasta deit otomatikamente sei hasa’e kresimentu ekonomia. Atu tau iha termus ne’ebe sinismu oituan, governu la persisa halo buat ida, gasta deit osan halo kompras deit mos, kresimentu ekonomiku sei akontese.

 

2. Kampu servisu menus mos iha relasaun ho estrutura GDP ne’ebe iha Timor Leste, laiha investimentu real ne’ebe loke kampu trabalho. Maske durante tinan 6 (2006-2011) despeza kapital hamutuk US$1,382 mil milhões (37%) la konsege absorve trabalhadores tanba kuaze servisu ne’ebe halo uza ekipamentu pezadu, forsa ema nian minimu tebtebes nune’e ema mak atu servisu mos oituan deit. Dezafiu bo’ot liu mak infrastrutura ne’ebe mak durante ne’e halo laiha kualidade no seidauk kondis atu dada investor sira mai iha rai laran atu loke kampu trabalho.

 

3. Inflasaun iha relasaun mos ho montante osan nebe sirkula iha rai laran. Iha kontextu Timor Leste ho inflasaun 8%, ida ne’e hanesan heransa husi tempu UNO nian kedan, bainhira osan tama barak iha rai laran maibe iha tempu ne’eba  laiha institusaun moneter nasional ne’ebe halo kontrola ba kresimentu osan/ - money growth iha rai laran. Instituisaun Monetária Finansiru/ IMF mak asume kargu ne’e hodi introdus US Dollar atu netralisa inflasaun. 

 

Tanba-ne’e, bainhira Banco Central establese ona, institusaun ida ne’e iha responsibilidade atu maneja money growth, sirkulasaun osan iha rai laran ka politika moneter atu minimiza inflasaun. Valor osan sei tun bainhira merkado be absorve nia kliente (se povu iha ona kapasidade atu kompras) iha rai laran, no ita hotu hatene katak povu Timor Leste nia kapasidade kompras sei ki’ik liu.  Luta Hamutuk hakarak hateten katak,  presiza mos politika fiskal ida ne’ebe bele resolve problema inflasaun mak to’o 8%, hanesan hadia infrastrutura ba distribusaun alimentar, presiza mos iha politika moneter hodi halo balansu ba politika fiskal, maske ita seidauk iha moeda rasik maibe governu liu husi Banco Central bele kria framework ida ba osan funan iha banco nune bele kria ambiente diak ba komunidade no emprezariu sira no hamenus gropu balun ne’ebe kaer osan barak no gosta halo gastus ba konsumu deit. 

 

Dependensia Timor Leste ba Fundo Petróleo

Iha proposta OJE 2012 total despeza estadu estimadu hamutuk US$1,763.4 mil milhões de dólar americanos, nune’e hakarak ka lakohi tenki foti duni osan husi konta fundo petroliferu kuaze hamutuk US$1,573.3 mil milhões de dólar, reprezenta 89%, aumentu mak sae kompara ho tinan 2011 (US$1,055 mil milhões) hamutuk 67% ne’ebe hatudu katak iha indikasaun forte ba dependensia maka’as ba fundo petróleo bainhira seitor non-petroleo la dezenvolve rapidamente.

 

Imposto domestika rasik labele atu selu deit despeza salariu nian mos la to’o, sa tan despeza korrente seluk mak hanesan: bens e servusu, kapital minor no transferensias ne’ebe mak iha tentativas aumenta kada tinan. Luta Hamutuk hakarak apela ba orgaun do estadu katak sei ita la dezenvolve seitor produktivu sira hodi hetan reseitas bele prejudika sustentabilidade fundo petróleo. 

 

Laiha politika klaru atu hasa’e reseitas domestika iha mediu no longu prazu

Hare’e husi reseitas ne’ebe mai husi aktividades ekonomia iha rai laran, tinan-tinan governu kolekta deit reseitas entre 5%-10% deit, nune’e iha indikasaun forte Timor Leste sempre iha defisit orsamentu to’o 90%-95%, inklui iha tinan fiscal 2012 hatudu defisit orsamentu 92%, ne’e inklui ona reseitas ne’ebe mai husi imprestimus/ deve hamutuk US$33,1 milhões de dólar (2%). Reseitas domestika bele deminui deit 8% iha OJE tinan fiscal 2012. Defisit ne’ebe akontese iha OJE kada tinan hatudu katak laiha balansu ne’ebe signifikadu husi reseitas domestiku, no sei dependensia maka’as karga husi fundu petróleo ne’ebe lolos fundo petróleo tenki sai hanesan motor aranka deit.

 

Iha proposta OJE 2012, Luta Hamutuk descobre katak governu seidauk aprezenta politika investimentu estratejiku ne’ebe hatudu numeru osan ne’ebe mak sei hetan iha futuru, tanba tabela projeksaun reseitas domina ho oinsa utiliza osan iha kofre fundo Petróleo nian. Ne’ebe laiha duni meus apropriadu balun hodi halo balansu entre reseitas domestiku nomos fundo petróleo iha futuru.

 

Tuir monitoramentu ne’ebe Luta Hamutuk hala’o ba rendimentu domestika durante ne’e hatudu katak iha instituisaun publiku barak mak laiha reseitas ba estadu maske tinan-tinan governu sempre aloka osan. Por ezemplo laiha reseitas husi RTTL, Instituto Jestaun Ekipamentu (komesa tinan hat ikus tinan 2007-2010 laiha reseitas) no exportasaun café no produtu agrikultura balun. Relasiona ho reseitas domestika (reseitas fiskais) ne’e, Luta Hamutuk kestiona politika exportasaun ne’ebe jere husi MTCI, tamba durante ne’e estadu Timor Leste seidauk iha impostu exportasaun maske ita hotu hatene iha potensia produtu lokal barak mak halo exportasaun no lolos bele hetan impostu hodi kontribui ba OJE. Nune’e mos, ami descobre katak impostu barak mai husi importasaun ne’ebe kadak tinan hetan aumentu, hatudu katak osan barak mak sempre semo ba rai liur. Ne’e hatudu katak aktividades ekonomia iha rai laran sei fraku tebtebes.

 

 

PONTUS IMPORTANTE HODI KONSIDERA NO REKOMENDASAUN

 

Tuir mai Luta Hamutuk nia hanoin, opiniaun no analize ba pontus ne’ebe mak konsidera importante nune’e bele hadia diak liu tan implementasaun Orsamentu Jeral Estadu iha tinan fiscal 2012. :

 

  1. Relatoriu exekusaun orsamentu jeral estadu nunka aprezenta metas mak governu atinzi: husu ba governu atu aprezenta relatoriu exekusaun ho ninia metas mak governu atinzi tiha ona atu nune’e ita bele hatene no akompanha mudansa ba nesesidades povu nian ba futuru.

 

Tuir monitorizasaun ne’ebe Luta Hamutuk halo durante ne’e deskobre relatoriu exekusaun orsamentu jeral estadu sempre hatudu deit estatmentu despeza ho numeru deit, nunka iha esplikasaun metas mak atinzi, la hatudu indikadoriu no laiha sasukat ba implikasaun ba povu nia moris.

 

Tanba-ne’e, ami husu ba governu antes hato’o proposta orsamentu foun tenki hato’o relatoriu exekusaun do orsamentu. Bainhira laiha esplikasaun orsamentu ninia metas mak atinzi defisil ba ita atu hatene progressu husi investimentu orsamentu. Ita lahatene impaktu husi osan ne’ebe mak governu uza, mudansa mak povu hetan husi investimentu no planu ba oin hodi kompleta investimentu mak halo tiha ona. No ninia implikasaun mak, tinan-tinan aloka osan barak maibe povu seidauk senti ka benefisia husi orsamentu.

 

  1. Proposta orsamentu 2012 foti liu rendimentu sustentável estimadu (RSE) 3% husi Fundo Petrolífero: iha proposta orsamentu 2012 governu foti liu RSE hamutuk kuaze US$908 milhões de dólar americanos. 

 

Tuir RSE 3%, governu bele foti hamutuk US$665,3 milhões de dólar deit maibe sae to’o US$1,573.3 mil milhões de dólar. Ne’e hatudu katak governu la hatudu disiplina iha utulizasaun Fundo Petróleo ho prudenti no kuidadu. Timor Leste Indikasaun forte iha dependensia makaas ba iha ita nia osan minarai, kuaze 90% despeza estado mai husi Fundo Petróleo. Hodi hateten katak, indisiplina uza Fundo Petrolífero hahu kedan husi tinan 2008 to’o agora afeita dadaun ona ba iha sustentabilidade no existensia fundo ne’e rasik.

 

Luta Hamutuk husu ba orgaun do estado tomak katak, sei uza Fundo Petrolífero ne’e la ho kuidadu no prudenti, ita nia fundo sei mohu iha tinan 15 to’o 20 nia laran. Tanba investimentu ne’ebe halo dadaun barak mak laiha kualidade, tempu oin mai sei supa makaas liu tan kustu manutensaun ne’ebe aumenta bo’ot ba beibeik, no laiha planu hodi sai husi dependesia fundo petróleo bele lori nasaun ne’e ba iha risku bangkrut nia laran.

 

  1. Tau as nesesidades baziku povu nian iha prioridades: proposta orsamentu 2012 la hatudu alokasaun ne’ebe mak signifikadu ba iha nesesidades baziku mak povu infrenta dadaun. 

 

Iha tinan ida ne’e, aihan karun ba beibeik, povu falta aihan no hamlaha, bee-mos no eletrisidade hanesan prioridades importante no obrigatoriu hodi rezolve lalais iha tempu badak nia laran. Ita labele husik ona povu atu hein tan, no iha moris at ba beibeik nia laran no infrenta mal-nutrisaun, mal-higienidade no moris kiak iha ninia osan minarai ne’ebe aumenta ba beibeik no konsege besik ona US$9 mil milhões de dólar.

 

Estadu iha resitas bo’ot no riku, no iha tinan hat ne’e foti liu RSE 3%, maibe la konsege hadia ninia povu nia moris, problema nia abut nunka rezolve no halerik wain povu husik hanesan kantiga murak ba ukun nain sira.

 

  1. Montante orsamentu 2012 la reflete kapasidade governu nian: exekusan tinan 2011 hatudu katak dezenpenho governu nian sei fraku, no laiha razaun atu foti osan barak liu ba iha tinan 2012.

 

Hare’e no analize exekusaun aktual 2011 iha fulan Outubro 2011, governu  foin mak exekuta aktual osan hamutuk US$712 (55%) milhões de dólar husi total orsamentu hamutuk US$1,306 mil milhões  de dólar, ne’ebe governu seidauk exekuta US$594 milhões (45%) no governu so iha tempu exekusaun efektivu hela fulan rua deit ona. Ho exekusaun ne’ebe fraku, no hetan aumentu osan bo’ot iha tinan 2012 la reflete kapasidade governu nian.

 

Luta Hamutuk hakarak hateten katak, aumentu osan liu 35% iha 2012 signifika atu rezolve buat bo’ot ne’ebe povu infrenta, maibe presiza reorganiza no disiplina ministeriu sira hotu nune’e bele implementa projetu estratejiku sira, servisu tenki sinerjia no integradu ho ministeriu seluk atu bele atinzi espektasaun governu nian, presiza mos iha mekanismu koordenasaun ne’ebe adekuadu, koopera ho autoridades lokal iha prosesu kontrollu, loke dalan hodi bele asesu dokumentus kontratu sira no ministru sira tenki tuir duni orientasaun chefe governu nian nune’e dezenvolvimentu bele benefisia ba povu maioria.

 

  1. Luta Hamutuk rejeita planu imprestimus iha proposta orsamentu 2012 hamutuk US$33,1 milhões de dólar: laiha razaun forte governu halo imprestimus bainhira osan ne’ebe ita iha sei sufisiente atu halo dezenvolvimentu. 

 

Akompanha dezenpenho governu nian hodi exekuta osan no kualidade implementasaun sei hatudu frakeza barak, ami hanoin katak governu lalika loke tan espasu ba iha komplexidade iha jestaun orsamentu estadu nian. Ami husu atu governu bele fokus liu ita nia osan rasik nune’e povu hetan ninia benefisiu no hakmaan jestaun, inklui hadia nafatin dezenpenho governu nian.

 

Aumentu emprestimus ne’ebe lolos ki’ik hodi uza Fundo Petróleo ba garante imprestimus sei prejudika konsentrasaun governu nian nomos sei laiha kontrolla diak sei afeita ba iha jerasaun rohan laek, ne’ebe nasaun monu ona ba imprestimus tanba estraga sistema mak diak ba beibeik no sei afeita ba deve rohan laek.  Nasaun barak mak monu ona iha malisan deve, no husu ba entidades estadu tomak atu aprende husi deve ne’ebe nasaun sira seluk halo no ikus deve hafraku tiha soberanu estadu ida. Nasaun sai subordinadu no iha dependensia maka’as ba iha instituisaun finanseiru internasional.

 

  1. 6.    Programa Dezenvolvimentu Desentralizadu (PDD): governu laiha plano ne’ebe klaru ba projetu PDD 1 no 2 nune’e projetu barak mak kansela, reorsamenta no hamosu audisional orsamentu no lori governu ba iha dividas iha prosesu implementasaun projetu.

 

Relasiona ho politika desentralizasaun, iha tinan fiskal 2012 governu kontinua aloka orsamentu ba iha PDD 1 no 2 ho montante orsamentu hamutuk US$52,5 milhões de dólar. Luta Hamutuk kontinua kestiona kapasidade Agensia Dezenvolvimentu Nasional (ADN), Ministeriu Finansas, Ministeriu Estatal Ordenamentu Territoriu no linhas Ministerial sira ne’ebe ladun hatudu nia kapasidade maximu ba planeamentu no implementasaun PDD 1 no 2 iha nivel distritu.

 

Bazeia ba rezultadu monitoramentu ne’ebe Luta Hamutuk hala’o ba projetu PDD iha tinan fiscal 2011, indika katak kuaze projetu hotu-hotu ne’ebe tama iha katergoria PDD 1 no 2 laiha planu nebe klaru; inklui laiha espesifikasaun tekniku konaba dezenhu no bid of quantity (BoQ). Nune’e iha prosesu implementasaun projetu barak mak akontese kanselamentu, iha mudansa valor osan no fatin projetu nune’e mos kria konfuzaun iha nivel komunidade. Luta Hamutuk mos preokupa ho kapasidade Ministeriu Finansas ne’ebe hatudu nia inkapasidade iha prosesu pagamentu ba projeitu PDD, kuaze projetu sira ba PDD ninia pagamentu atrazadu, nomos tenki reorsamenta fila fali iha tinan fiscal 2012, ne’ebe ami konsidera hanesan impedimentu ba prosesu dezenvolvimentu iha rai laran.

 

  1. Alokasaun Orsamentu ba Ministeriu Edukasaun, Saúde no Agrikultura ki’ik liu: proposta OJE 2012 hatudu katak governu la seriu atu dezenvolve seitor edukasaun, saúde no agrikultura iha rai laran.

 

Iha proposta OJE 2012, governu halo alokasaun orsamentu ba ministeriu tolu ne’ebe ki’ik tebtebes, Ministeriu Edukasaun hetan deit 5% (US$86,635 milhões), Ministeriu Saude 2,5% (US$44,408 milhões) kompara ho tinan 2011 reprezenta 3% no Ministeriu Agrikultura iha deit menus husi 1% (US$15,904 milhões) hanesan mos iha tinan kotuk.

 

Hare’e husi planu no alokasaun OJE 2012 ne’ebe ki’ik no nudar nasaun mak foin dezenvolve an dadaun ba ministeriu importante tolu ne’e hatudu katak, ministeriu tolu ne’e laiha planu ida que diak hodi koresponde situasaun real ne’ebe povu infrenta konaba fasilidades escola ho nia infrastruktura, fasilidade klinika/ ospital, irigasaun, produsaun agrikula ne’ebe la konsege demenui aihan iha rai laran, seitor pescas ne’ebe la-dezenvolve, sanitasaun ne’ebe do’ok husi higienidade, mal-nutrisaun no etc. Hare’e ba alokasaun orsamentu ne’e, ami hakarak dehan katak governu laiha sensibilidade ba halerik wain povu durante ne’e. 

 

Mak ne’e deit, ba atensaun ita hotu nian, la haluha ami hato’o obrigado wain!

 

 

 

Dili: 21 de Outubro de 2011

 

 

Mericio Akara

Direitor Luta Hamutuk

Tel: 7263783